پاڪستان ليگ جي سربراهه چوڌري شجاعت حسين چيو آهي ته وڳوڙ ۽ ڌرڻن سان قوم ۾ پريشاني ۽ مايوسي وڌي رهي آهي، سياستدان ٻرندي تي تيل بدران پاڻي وجهن، ملڪ ڀڃ ڊاهه ۽ گهيراءُ برداشت نٿو ڪري سگهندو، حڪومت نيشنل ڊائيلاگ شروع ڪري، هو ناراض قومي اڳواڻن وٽ وڃڻ لاءِ تيار آهن.
پاڪستان ليگ جي مرڪزي ۽ صوبائي جنرل ڪونسل جو گڏيل اجلاس چوڌري شجاعت حسين جي صدارت هيٺ ٿيو، جنهن ۾ طارق بشير چيمه، چوڌري سالڪ حسين، فرخ خان، طارق حسن، رضوان صادق ۽ ٻين شرڪت ڪئي.
صوبائي ڪونسل چوڌري سرور کي پنجاب جو صدر، چوڌري شافع حسين کي جنرل سيڪريٽري چونڊيو ويو.
اجلاس ۾ فيصلو ڪيو ويو ته چوڌري سرور پارٽي جي مرڪزي چيف آرگنائيزر به هوندو.
ان موقعي تي چوڌري شجاعت حسين، چيو ته 50 سال سياسي سفر کي مڪمل ٿي ويا آهن، اهڙي مونجهيل حالتن ناهن ڏٺيون.
هن چيو ته وڳوڙ ۽ ڌرڻن سان قوم ۾ پريشاني ۽ مايوسي وڌي رهي آهي، سياستدان ٻرندي تي تيل بدران پاڻي وجهن.
سندس چوڻ هو ته ملڪ ڀڃ ڊاهه ۽ گهيراءُ برداشت نٿو ڪري سگهندو، حڪومت نيشنل ڊائيلاگ شروع ڪري، هو ناراض قومي اڳواڻن وٽ وڃڻ لاءِ تيار آهن.
چوڌري شجاعت حسين چيو ته مسئلن جو حل سياسدانن وٽ آهي، سموريون طاقتون گڏجي پاڪستان جو سوچين.
ان موقعي تي چوڌري سرور چيو ته مسلم ليگ طرفان اعتماد جو اظهار ڪرڻ تي هو پوري پارٽي جو ٿورائتو آهي، سڀ گڏجي مسلم ليگ کي متبادل سياسي طاقت بڻائن.
