ٺٽي ڀرسان خوفناڪ حادثي جي نتيجي ۾ 9 ڄڻا فوت ٿي ويا.
چليا ويجهو ٽول ٽيڪس وٽ ٺٽو حيدرآباد قومي شاھراهه تي سوزڪي پڪ اپ ۽ ٽرڪ ۾ خوفناڪ ٽڪر ٿي پيو.
حادثي جي نتيجي ۾ سوزڪي ۾ سوار 8 ڄڻا موقعي تي فوت ٿي ويا جڏھن ته ھڪ ڄڻو زخمي ٿي پيو، حادثي بعد فوتين جا لاش ۽ زخمي کي سول اسپتال مڪلي آندو ويو، جتي زخمي زخمن جا تاب نه سھندي فوت ٿي ويو.
فوتين ۾ عبد الله، تسبع الله، محمد قصر، نور الله، وھاب ۽ ٻيا شامل آهن.
ٽرڪ ۽ سوزوڪي ۾ زوردار ٽڪر جي نتيجي ۾ سوزوڪي ۾ سوار ماڻهو ٽرڪ ۾ ڦاٿل رھيا، 1122 ريسڪيو عملي پاران وڏين ڪوششن بعد ٽرڪ ۾ ڦاٿل لاشن کي ڪڍيو ويو.
سوزڪي پڪ اپ ڪراچي کان ڪينجھر وڃي رھي ھئي ته چليا ٽول ٽيڪس وٽ سامھون کان ايندڙ ٽرڪ سان زوردار ٽڪر ٿي پيو. حادثي جو شڪار بڻيل بدنصيب سوزوڪي ۾ 9 ڄڻا ئي سوار ھئا جيڪي سڀئي حادثي ۾ فوت ٿي ويا، فوتين جا مڙهه ايڌي سرد خاني سهراب ڳوٺ ڪراچي منتقل ڪيا ويا.
حادثي بعد ٽرڪ ڊرائيور موقعي تان فرار ٿي ويو، جڏھن ته پوليس ٽرڪ کي تحويل ۾ وٺي ڇڏيو آھي.
هوڏانهن وڏي وزير مراد علي شاهه ۽ گورنر ڪامران خان ٽيسوري روڊ حادثي ۾ ماڻهن جي فوت ٿيڻ تي ڏک جو اظهار ڪيو آهي.
وڏي وزير انتظاميا کي متاثر ماڻهن جي مدد ڪرڻ ۽ ٺٽو اسپتال ۾ ايمرجنسي لاڳو ڪرڻ جي هدايت ڪئي.
گورنر ڪامران ٽيسوري پاران حادثي بابت ڪمشنر حيدرآباد کان رپورٽ طلب ڪري ورتي آهي.
