سپريم ڪورٽ جي جج جسٽس قاضي فائز عيسيٰ چيو آهي ته سپريم ڪورٽ طرفان ٻڌائڻ چاهي ٿو ته هو آئين سان گڏ بيٺل آهن، سندس موجودگيءَ ۾ جيڪي سياسي ڳالهيون ٿيون، ان سان متفق ناهي.
قومي آئيني ڪنويشن کي خطاب ڪندي جسٽس قاضي فائز عيسيٰ چيو ته هو پنهنجي اداري طرفان چوڻ چاهي ٿو ته هو آئين سان گڏ بيٺل آهي، الله جي ڪتاب کانپوءِ هن ڪتاب جو سايو آهي.
هن چيو ته سياست سياستدانن جو ڪم ۽ هو شين کي قانون جي نظر سان ڏسندو آهي، سندن ڪم قانون موجب فيصلا ڪرڻ ۽ اوهان جو ڪم عوامي مفاد ۾ قانونسازي ڪرڻ آهي.
جسٽس قاضي فائز عيسيٰ چيو ته هو ڪڏهن ڪڏهن دشمن سان به ايڏي نفرت ناهن ڪندا جيتري هڪٻئي سان ڪن ٿا، غلطين کي سمجهي اڳتي وڌڻ گهرجي.
هن چيو ته آئين جي گولڊن جوبلي ۾ شرڪت لاءِ هو حاضر ٿيو، ٻيا جج مصروف هجڻ سبب نه آيا، هن پڇيو ته ڪهڙيون ڳالهيون ٿينديون، ٻڌايو ويو ته آئين بابت ڳالهايو ويندو، سندس موجودگيءَ ۾ جيڪي سياسي ڳالهيون ٿيون هو انهن سان متفق ناهي.
جسٽس قاضي فائز عيسيٰ چيو ته ٿي سگهي ٿو سڀاڻي هتي ويٺل ماڻهن خلاف فيصلو اچي وڃي ته اسان اوهان کي گهرايو هو، پوءِ به اسان خلاف فيصلو ڏن ويو، هو آئين سان گڏ بيٺل آهن ۽ ان موجب ڪم ڪندا رهندا.
