ٽنڊي حيدر ويجهو منشيات واپرائيندڙ نوجوان فوت ٿي ويو جڏهن ته منشيات جي وڪري ۽ نوجوان جي فوت ٿيڻ واري واقعي خلاف ڳوٺاڻن پاران احتجاجي مظاهرو ڪري ڌرڻو هنيو ويو.
پٻڻ ٿاڻي جي حد جهڻ موري واسي 18 ورهين جي الهيار عرف حاجي زئور جو گهوٽاڻو جي ايگليڪچر آفيس مان لاش مليو.
اطلاع ملڻ بعد وارثن واقعي واري هنڌ پهچي لاش سول اسپتال پهچايو جتي ڊاڪٽرن وڌيڪ منشيات واپرائڻ سبب نوجوان جي فوت ٿيڻ جي تصديق ڪئي.
اسپتال مان ضروري ڪارروائي بعد مڙهه وارثن حوالي ڪيو ويو.
الهيار عرف حاجي زئور جو مڙهه گهر پهچڻ تي ڪهرام مچي ويو.
نوجوان جي مبينا منشيات واپرائڻ سبب فوت ٿيڻ ۽ منشيات جي وڪري خلاف عيسيٰ خان زئور، شفيع محمد، زبير، الطاف ۽ ٻين شيخ ڀرڪيو حيدرآباد روڊ تي جهڻ موري اسٽاپ وٽ ٽائر ساڙي احتجاجي مظاهرو ڪري ڌرڻو هڻي روڊ بند ڪري ڇڏيو.
احتجاج ڪندڙن ميڊيا سان ڳالهائيندي الزام هڻندي چيو ته پٻڻ ٿاڻي جي حد ۾ پوليس ۽ بااثرن جي سرپرستي ۾ منشيات وڪرو ٿي رهي آھي، پوليس کي لکين رپيا منٿلي ملي رهي آھي.
هنن چيو ته منشيات واپرائڻ سبب هڪ نوجوان حياتي وڃائي چڪو آھي جڏهن ته ڪيترائي نوجوان نشي جا عادي ٿي ويا آھن جن جون حياتيون خطري ۾ آھن.
احتجاج ڪندڙن اعليٰ اختيارين کان مطالبو ڪيو ته پٻڻ ٿاڻي جي ايس ايڇ او کي هٽائي مبينا طور منشيات واپرائڻ سبب فوت ٿيل نوجوان واري واقعي جي جاچ ڪرائي وارثن سان انصاف ڪيو وڃي.
ايس ايڇ او پٻڻ احتجاج ڪندڙن وٽ پهچي منشيات وڪرو ڪندڙ خلاف قانوني ڪارروائي ڪرڻ جو يقين ڏياري روڊ کولرائي ڇڏيو.
