افغانستان خلاف تن ٽوئنٽي ميچن لاءِ اعلانيل پاڪستان جي قومي ڪرڪيٽ ٽيم جي ڪپتان شاداب خان چيو آهي ته هو ٽيم کي ميدان ۾ ويڙهه ڪندي ڏسڻ چاهي ٿو جيئن دلچسپ مقابلو ٿئي.
پاڪستان ڪرڪيٽ بورڊ طرفان جاري ڪيل وڊيو ۾ ڪپتان شاداب خان چيو ته نوجوان رانديگرن تي ٻڌل ٽيم شاندار آهي، عماد وسيم، فهيم اشرف، عبدالله شفيق، طيب طاهر، اعظم خان ۽ صائم ايوب جهڙا ڪرڪيٽر بهترين فام ۾ آهن.
هن چيو ته عماد وسيم ۽ فهيم اشرف بهترين آل رائونڊر آهن، ٽيم ۾ سندن شامل ٿيڻ سان مڊل آرڊر مضبوط ٿيندو، جڏهن ته هو پاڻ ڪپتان جي حيثيت ۾ ٽيم لاءِ اهم ڪردار ادا ڪرڻ جي ڪوشش ڪندو.
شاداب خان چيو ته هو خدا جو شڪر گذار آهي، جنهن کيس ملڪ جي نمائندگيءَ جو موقعو ڏنو، سندس ڪوشش هوندي ته هو 22 ڪروڙ عوام جو ڳاٽ فخر سان اونچو ڪري، هو پنهنجون سموريون صلاحيتون ڪتب آڻي ميچ کٽڻ جي ڪوشش ڪندو.
