پارليامينٽ جي گڏيل اجلاس عدالتي سڌارن بابت بل منظور ڪري ورتو، قانون واري وزير، اعظم نذير تارڙ طرفان پيش ڪيل بل جي شق وار منظور ورتي وئي، پي ٽي آءِ سينيٽرن طرفان احتجاج ڪيو ويو، اعظم نذير تارڙ جو چوڻ آهي ته صدر پنهنجي خط ۾ سوال اٿاريا آهن، جيڪي مناسب ناهن، ڊاڪٽر عارف علوي کي صلاح آهي ته هو پي ٽي آءِ جو ڪارڪن نه پر رياست جي سربراهه طور ڪم ڪري، ون مين شو وارين ڳالهين جو اثر ختم ڪرڻ لاءِ قانون ٺاهيو، سمورا اختيار سپريم ڪورٽ جي ٻن سينيئر ججن کي ڏنا ويا آهن.
پارليامينٽ جو گڏيل اجلاس قومي اسيمبلي جي اسپيڪر راجا پرويز اشرف جي صدارت هيٺ ٿيو، جنهن ۾ قانون واري وزير، اعظم نذير تارڙ سپريم ڪورٽ پريڪٽس اينڊ پروسيجر بل منظوري لاءِ پيش ڪيو.
ان دوران پي ٽي آءِ سينيٽرن اسپيڪر جي ڊائس آڏو سخت احتجاج ڪيو ۽ نعريباز ڪئي، ميمبرن بل جون ڪاپيون ڦاڙي ڊائس طرف اڇلايون.
اجلاس کي خطاب ڪندي اعظم نذير تارڙ چيو ته عدالتي سڌارن بابت صدر کي منظوريءَ لاءِ موڪليو ويو هو، پر هن واپس ڪري ڇڏيو، قومي اسيمبلي ۽ سينيٽ مان منظور ڪيل بل واپس موڪليو ويو.
هن چيو ته صدر پنهنجي خط ۾ سوال اٿاريا آهن، جيڪي مناسب ناهن، صدر کي صلاح آهي ته هو پي ٽي آءِ جو ڪارڪن نه پر رياست جي سربراهه طور ڪم ڪري.
اعظم نذير تارڙ چيو ته ون مين شو وارين ڳالهين جو اثر ختم ڪرڻ لاءِ قانون ٺاهيو، سمورا اختيار سپريم ڪورٽ جي ٻن سينيئر ججن کي ڏنا ويا آهن.
هن چيو ته سينٽر مشتاق احمد دونهيندار تقرير ڪئي، سندس ترميمن جي مخالف ڪري ٿو.
ن ليگ جي شزا فاطمه عدالتي سڌارن بابت بل ۾ ترميم پيش ڪئي، جنهن جي قانون واري وزير حمايت ڪئي.
ترميم موجب قانون منظور ٿيڻ بعد قاعدا ۽ ضابطن طئه ڪرڻ لاءِ ججن جي ڪميٽيءَ جو پهريون اجلاس گهرايو ويندو، ضابطا ٺاهڻ تائين چيف جسٽس يا ڪو به جج گڏجاڻي گهرائي سگهي ٿو.
اجلاس دوران سپريم ڪورٽ پريڪٽس اينڊ پروسيجر بل جي شق وار منظوري ورتي وئي ۽ گڏيل اجلاس عدالتي سڌارن وارو بل اڪثريتي راءِ سان منظور ڪري ورتو.
