وزيراعظم شهبازشريف، قومي اسيمبليءَ مان اعتماد جو ووٽ حاصل ڪري ورتو، 180 ميمبرن مٿس اعتماد جو اظهار ڪيو، سندس چوڻ آهي ته ٽه رڪني بئنچ جو فيصلو قبول ناهي، عدالت گهر موڪلڻ چاهي ٿي ته هو تيار آهي، اهو نٿو ٿي سگهي ته پارليامينٽ قانون ٺاهي ۽ عدالت روڪي ڇڏي، سڄي ملڪ ۾ هڪ ئي ڏينهن اليڪشن ٿيندي، پي ٽي آءِ سان چونڊون هڪ ئي ڏينهن ڪرائڻ لاءِ ڳالهيون ٿينديون، هو ٽي رڪني بئنچ کي نٿا مڃن، کين چار ٽي وارو فيصلو قبول آهي.
قومي اسيمبليءَ جو اجلاس اسپيڪر راجا پرويز اشرف جي صدارت هيٺ ٿيو، جنهن ۾ پ پ چيئرمين بلاول ڀٽو زرداريءَ وزيراعظم شهبازشريف تي اعتماد جو ٺهراءُ پيش ڪيو.
ٺهراءُ پيش ٿيڻ بعد اسپيڪر ميمبرن کي اٿي بيهي وزيراعظم کي ووٽ ڏيڻ جي هدايت ڪئي، ٺهراءَ جي حق ۾ 180 ميمبرن اٿي بيهي وزيراعظم شهبازشريف تي مڪمل اعتماد جو اظهار ڪيو.
اسپيڪر راجا پرويز اشرف ڳڻپ کانپوءِ ٻڌايو ته مفتي عبدالشڪور زنده هجي ها ته اعتماد جا ووٽ 181 هجن ها، پر هاڻي وزيراعظم 180 ووٽ کنيا آهن.
اعتماد جو ووٽ وٺڻ بعد اجلاس کي خطاب ڪندي وزيراعظم شهبازشريف چيو ته اعتماد ڪرڻ تي هو اتحادين جو ٿورائتو آهي، هو سڀني جو مان رکندو، هو گهر وڃڻ لاءِ تيار آهي پر ڪوبه غلط فيصلو تسليم نه ڪندو.
هن چيو ته اهو نٿو ٿي سگهي ته پارليامينٽ قانون ٺاهي ۽ عدالت روڪي ڇڏي، عدليه کي آئين ٻيهر لکڻ جو ڪوبه اختيار نه آهي.
شهبازشريف چيو ته عدالت کي ڪي پي ۾ چونڊون ياد ڇو ناهي، پنجاب ۾ ئي چونڊن تي زور ڇو پيو ڀريو وڃي؟ هو ٽي رڪني بئنچ کي نٿا مڃن، کين چار ٽي وارو فيصلو قبول آهي.
هن چيو ته پارليامينٽ جي حڪم تي عمل ڪرڻ حڪومت ۽ ڪابينا جي ذميواري آهي، آئين ٺاهڻ پارليامينٽ جو ڪم آهي، آئين کي ري رائيٽ ڪرڻ جو سپريم ڪورٽ کي به اختيار ناهي.
وزيراعظم چيو ته فيصلو ڪيو آهي ته سينيٽ ۾ ڳالهين جي شروعات ڪئي ويندي، پي ٽي آءِ سان چونڊون هڪ ئي ڏينهن ڪرائڻ لاءِ ڳالهيون ٿينديون، سڄي ملڪ ۾ هڪ ئي ڏينهن اليڪشن ٿيندي.
هن چيو ته ملڪ ڏکين حالتن مان گذري رهيو آهي، اهي سموري صورتحال 2018ع ۾ ڌانڌليءَ سان آيل حڪومت جي ڪري ٿي، 2018ع جي چونڊن ۾ ٿيل ڌانڌليءَ جي جاچ ڪرائي وڃي.
وزيراعظم چيو ته روس کان سستو تيل جلد پاڪستان پهچي ويندو.
