پنجاب جي اڳوڻي وڏي وزير چوڌري پرويز الاھي چيو آھي تھ پارليامينٽ ۾ آئين جو تماشو بڻائيندڙن کي عوام عبرت جو نشانو بڻائيندو.
چوڌري پرويز الاھي سان اڳوڻي وفاقي وزير چوڌري وجاھت حسين، اڳوڻي ايم اين اي آفتاب احمد ڪڇي،. ايم اين اي اورنگزيب خان ڪڇي، اڳوڻي صوبائي وزير جھانزيب خان، شھزاد ڪڇي، سيد محمد سليم، سيد محمد احمد ۽ ٻين ملاقات ڪئي.
ان موقعي تي پي ٽي آءِ پنجاب جي مرڪزي صدر پرويز الاھي چيو تھ حڪومت غير آئيني بل جي ذريعي سپريم ڪورٽ اندر فرق پيدا ڪرڻ چاھي پئي پر سپريم ڪورٽ عدليا ۾ ڇڪتاڻ پيدا ڪرڻ جي حڪومتي ڪوشش ناڪام بڻائي ڇڏي.
پرويز الاھي چيو تھ فل ڪورٽ جو مطالبو ڪندڙ ڪھڙي منھن سان اڪثريتي فيصلي جي مخالفت ڪري رھيا آھن؟ پارليامينٽ ۾ عوام بدران رڳو حڪومت بچائڻ لاءِ قانون سازي ڪئي پئي وڃي.
ھن چيو تھ حڪومت پارليامينٽ جھڙي باوقار اداري کي ڪاميڊي ٿيٽر بڻائي ڇڏيو آھي، پارليامينٽ ۾ آئين ۽ قانون جو تماشو لڳائيندڙن کي عوام اليڪشن ۾ عبرت جو نشانو بڻائيندو.
