پ پ چيئرمين ۽ پرڏيهي وزير بلاول ڀٽو زرداري چيو آهي ته آمراڻي سوچ جمهوريت تي راتاهو هڻڻ جي موقعي جي ڳولا ۾ رهندي آهي، اهڙي سوچ صحافت جي آزادي جو ڳلو دٻائڻ لاءِ هر وقت تيار هوندي آهي، ميڊيا جي آزادي تي پابنديون، جمهوريت کي ڪمزور ۽ معاشري ۾ ورهاست جو سبب بڻجندي آهي، ڀارت طرفان والاريل ڪشمير ۾ صحافت تي پابندين جي هو مذمت ڪن ٿا، والاريل وادي ۾ صحافين کي قيد سميت ٻيون تڪليفون برداشت ڪرڻيون پونديون آهن.
آزادي صحافت جي عالمي ڏهاڙي تي پنهنجي پيغام ۾ بلاول ڀٽو زرداري چيو ته ميڊيا جي آزادي تي پابنديون، جمهوريت کي ڪمزور ۽ معاشري ۾ ورهاست توڙي ڏڦيڙ جو سبب بڻجندي آهي.
سندس چوڻ هو ته جمهوريت جي بحالي ۽ استحڪام لاءِ پيپلز پارٽي ۽ صحافين جي اتحاد هميشه سدا بهار ۽ مضبوط رهيو آهي.
پرڏيهي وزير بلاول ڀٽو زرداري چيو ته شهيد راڻي بينظير ڀٽو ۽ صدر آصف علي زرداري پنهنجي حڪومتي دور دوران صحافت تي لاڳو ڪاري قانون کي ختم ڪيو، پ پ ۽ سندس قيادت خلاف ملڪ ۾ بدترين ميڊيا ٽرائل ٿيندو رهيو آهي.
هن چيو ته ميڊيا ٽرائل جو نشانو بڻجڻ باوجود پ پ ڪڏهن به صحافت جي آزاديءَ تي مصلحت جو شڪار ناهي ٿي، پ پ حڪومت ۾ هجي يا مخالف ڌر ۾ صحافت جي آزادي بابت هميشه چٽو موقف اختيار ڪيو آهي.
سندس چوڻ هو ته پيپلز پارٽي ميڊيا جي آزادي ۽ صحافين جي حقن جي تحفظ لاءِ پنهنجو قائداڻو ڪردار ادا ڪندي رهندي.
پ پ چيئرمين ۽ پرڏيهي وزير بلاول ڀٽو زرداري چيو ته ڀارت طرفان والاريل ڪشمير ۾ صحافت تي پابندين جي هو مذمت ڪن ٿا، والاريل وادي ۾ صحافين کي قيد سميت ٻيون تڪليفون برداشت ڪرڻيون پونديون آهن، سال ۾ هڪ ڏينهن والاريل ڪشمير جي صحافين سان ٻڌي جي ڏهاڙي طور به ملهائڻ گهرجي.
