پبلڪ اڪائونٽس ڪميٽيءَ آڊٽ نه ڪرائڻ تي هڪ ڀيرو ٻيهر سپريم ڪورٽ جي رجسٽرار کي طلب ڪري ورتو، نور عالم خان جو چوڻ آهي ته ڏهن ورهين کان سپريم ڪورٽ آڊٽ نه پئي ڪرائي، سپريم ڪورٽ کي ڪنهن به اداري يا ڪلب جو ايڊمنسٽريٽر توڙي سربراهه مقرر ڪرڻ جو اختيار ناهي، پي اي سي فيڊرل لاجز اسلام آباد ۾ 252 سرڪاري آفيسرن جي قبضي جي انڪشاف بعد هائوسنگ واري وزارت کي فوري طور فيڊرل لاجز خالي ڪرائڻ جي هدايت ڪئي وئي.
پبلڪ اڪائونٽس ڪميٽيءَ جو اجلاس چيئرمين نور عالم خان جي صدارت هيٺ ٿيو.
اجلاس دوران بين الصوبائي رابطن واري وزارت جي آڊٽ رپورٽ تي غور ڪيو ويو.
پي سي بي جي مينيجمينٽ ڪمٽيءَ جي چيئرمين نجم سيٺي جي شرڪت نه ڪرڻ تي ڪاوڙ جو اظهار ڪيو.
چيئرمين پڇاڻو ڪيو ته گن اينڊ ڪنٽري ڪلب جو سربراهه ڪير آهي؟ جنهن تي سيڪريٽري آءِ پي سي جواب ڏنو ته انتظامي آفيسر سپريم ڪورٽ مقرر ڪيو آهي، نعيم بخاري کي ايڊمنسٽريٽر گن اينڊ ڪنٽري ڪلب مقرر ڪيو ويو هو، هو ون مين شو طور ڪم ڪري رهيو آهي.
نور عالم خان چيو تها اجلاس دوران فيڊرل لاجز ۾ 252 سرڪاري آفيسرن جي قبضي جو انڪشاف ڪيو ويو.
سيڪريٽري هائوسنگ اجلاس کي ٻڌايو ته فيڊرل لاجز ۾ ٻين شهرن کان ايندڙ آفيسرن کي هڪ سال لاءِ رهائش ڏني وڃي ٿي ۽ مدو پورو ٿيڻ تي ڇهن مهينن جي واڌ ڪئي وڃي ٿي.
آڊٽ اختيارين چيو ته هن وقت 252 آفيسر اهڙا آهن، جيڪي ڪيترن ئي ورهين کان لاجز ۾ رهن ٿا، ڏيڍ سئو آفيسرن عدالت کان اسٽي آرڊر ورتو آهي.
پي اي سي هائوسنگ واري وزارت کي فوري طور فيڊرل لاجز خالي ڪرائڻ جي هدايت ڪئي.
نور عالم خان چيو ته پوليس جي مدد وٺڻي پوي ته ضرور ورتي وڃي.
پي اي سي ڏهن ورهين کان آڊٽ نه ڪرائڻ تي سپريم ڪورٽ جي رجسٽرار کي عيد کان پوءِ طلب ڪري ورتو.
