پروفيسر ڊاڪٽر اجمل ساوند جي قتل تي سنڌ ۾ ڏک ۽ ڪاوڙ جي لهر برقرار آهي جڏهن ته مختلف شهرن ۾ ڊاڪٽر اجمل جي قاتلن جي گرفتاريءَ لاءِ ٻئي ڏينهن به احتجاجي ريليون ڪڍي مظاهرا ڪري ڌرڻا هنيا ويا.
لاڙڪاڻي ۾ شهيد بينظير ڀٽو ميڊيڪل يونيورسٽيءَ جي ٽيچرس ايسوسي ايشن طرفان عبدالحفيظ ابڙي، امداد ڊومڪي، ڊاڪٽر ڪمليش ڪمار ۽ ٻين جي اڳواڻيءَ ۾ ڪاليج کان يونيورسٽيءَ جي مک گيٽ تائين احتجاجي ريلي ڪڍي نعريبازي ڪئي وئي.
هالاڻي ۾ صوفين جي تنظيم پاران ڊاڪٽر اجمل ساوند جي قتل خلاف احتجاجي مظاهرو ڪيو ويو.
بڊاڻي ۾ ڊاڪٽر اجمل ساوند جي قتل خلاف سياسي سماجي اڳواڻن ۽ صحافين پاران مظهر چاچڙ، دانش شاهه ۽ ٻين جي اڳواڻيءَ ۾ احتجاجي ريلي ڪڍي نعريبازي ڪئي وئي.
اڳواڻن چيو ته پروفيسر ڊاڪٽر اجمل ساوند جو قتل، شعور جو قتل آهي، اهو قتل استاد جو قتل آهي.
هنن چيو ته اجمل ساوند پرڏيهه مان اعليٰ تعليم حاصل ڪري پنهنجي ملڪ ۽ سنڌ جي نوجوانن کي علم جي روشني سان نوازڻ آيو ھو پر انسانيت ۽ علم جي قاتل کيس قبائلي تڪرار جي ور چاڙھي گولين جو نشانو بڻائي قتل ڪري ڇڏيو.
سندن چوڻ هو ته ڊاڪٽر اجمل ساوند جي قتل جي جيتري مذمت ڪجي اها گهٽ آهي سنڌ ۾ لاقانونيت جي ڪاري رات آھي، قبيلائي تڪرار سنڌ جي لاءِ ناسور آھن، قبيلائي تڪرارن سبب بيگناهه انسانن جو قتل معمول بڻيل آهي.
اڳواڻن چيو ته قبيلائي جھيڙي سبب ھڪ اعليٰ تعليم يافته پروفيسر ۽ عالم کي گولين جو نشانو بڻايو ويو، جيڪو سنڌي سماج لاءِ وڏو نقصان آھي.
ھنن چيو ته سنڌ گورنمينٽ کي گهرجي ته اعليٰ تعليم يافته پروفيسر اجمل ساوند جي ٻارن کي سرڪاري خرچ تي تعليم ڏياري قاتلن کي انجام تائين پهچايو وڃي، ٻي صورت ۾ احتجاج جو دائرو وڌايو ويندو.
