پروفيسر ڊاڪٽر اجمل ساوند جي قتل تي ڏک ۽ ڪاوڙ جي لهر برقرار آهي جڏهن ته سنڌ جي مختلف شهرن ۾ قاتلن جي گرفتاريءَ لاءِ ٽئين ڏينهن به ايس ٽي پي سميت ٻين ڌرين پاران احتجاجي ريليون ڪڍي مظاهرا ڪري ڌرڻا هنيا ويا.
لاڙڪاڻي ۾ سنڌ ترقي پسند پارٽيءَ جي مرڪزي سڏ تي پروفيسر ڊاڪٽر اجمل ساوند جي قتل خلاف سنڌي ادبي سنگت ۽ اهل فقرا درگاهه جهوڪ شريف پاران اختر بليدي، گل دايو، ڪرشن لعل ۽ ٻين جي اڳواڻيءَ ۾ پريس ڪلب اڳيان احتجاجي مظاهرو ڪيو ويو.
ٽنڊي الهيار ۾ سنڌ ترقي پسند پارٽيءَ جي سڏ تي پروفيسر اجمل ساوند جي قاتلن جي گرفتاريءَ لاءِ افضل جسڪاڻي، امداد ناريجو، محبوب سمون ۽ ٻين جي اڳواڻيءَ ۾ ايس ٽي پي هائوس کان پريس ڪلب تائين احتجاجي ريلي ڪڍي وئي.
ڄامشوري ۾ سنڌ ترقي پسند پارٽيءَ جي سڏ تي پروفيسر اجمل ساوند جي قتل خلاف ساگر عالماڻي، يونس اوٺو، سڪندر بليدي ۽ ٻين احتجاجي ريلي ڪڍي نعريبازي ڪئي.
نوشهرو فيروز ۾ سنڌ ترقي پسند پارٽيءَ جي سڏ تي پروفيسر اجمل ساوند جي قاتلن جي گرفتاري لاءِ اقبال راڄپر، حبيب مشوري، اصغر ڀرٽ ۽ ٻين پاران احتجاجي مظاهرو ڪيو ويو.
جيڪب آباد ۾ سنڌ ترقي پسند پارٽيءَ جي سڏ تي پروفيسر اجمل ساوند جي قتل خلاف عبدالستار جاگيراڻي، نظام مستوئي ۽ ٻين جي اڳواڻيءَ ۾ ترقي پسند هائوس کان پريس ڪلب تائين احتجاجي ريلي ڪڍي ڌرڻو هڻي نعريبازي ڪئي وئي.
مٺي ۾ سنڌ ترقي پسند پارٽي جي سڏ تي پروفيسر اجمل ساوند جي قاتلن جي گرفتاري لاءِ گهنشان مالهي، لالا مهيش ۽ ٻين پريس ڪلب آڏو احتجاجي مظاهرو ڪري نعريبازي ڪئي.
شهدادڪوٽ ۾ سنڌ ترقي پسند پارٽي پاران پروفيسر اجمل ساوند جي قتل خلاف احتجاجي ريلي ڪڍي ڪوٽو موٽو چوڪ تي ڌرڻو هنيو ويو.
ميرپور ماٿيلي ۾ ايس ٽي پي جي مرڪزي سڏ تي پروفيسر ڊاڪٽر اجمل ساوند جي قاتلن جي گرفتاري لاءِ علي نواز جلباڻي، مصطفيٰ نائچ ۽ ٻين پريس ڪلب اڳيان احتجاجي مظاهرو ڪري نعريبازي ڪئي.
ڪنڌڪوٽ ۾ مختلف سياسي سماجي تنظيمن پاران پروفيسر ڊاڪٽر اجمل ساوند جي قتل ڪيس ۾ گهربل جوابدارن جي گرفتاري لاءِ اڪرم باجڪاڻي، سجاد بروهي، ڊاڪٽر سريش آنند ۽ ٻين جي اڳواڻيءَ ۾ گهنٽا گهر کان پريس ڪلب تائين احتجاجي ريلي ڪڍي وئي.
سانگهڙ ۾ پروفيسر اجمل ساوند جي قاتلن جي گرفتاريءَ لاءِ صوفي فقير جي جماعت پاران پريس ڪلب آڏو احتجاجي مظاهرو ڪري ڌرڻو هنيو ويو.
فيض گنج ۾ سياسي سماجي تنظيمن جي ڪارڪنن پاران پروفيسر اجمل ساوند جي قتل خلاف تصور باقي، عبدالغني شر ۽ ٻين جي اڳواڻي ۾ پڪا چانگ جي مک چوڪ تي احتجاجي مظاهرو ڪري ڌرڻو هڻي نعريبازي ڪئي وئي.
نئين ديري ۾ صوفي فنڪارن ۽ شهرين پاران پروفيسر اجمل ساوند جي قتل خلاف منور فقير ابڙي، صدر الدين شاهه، سليم ڀٽو ۽ ٻين جي اڳواڻيءَ ۾ احتجاجي ريلي ڪڍي پريس ڪلب اڳيان مظاهرو ڪيو ويو.
کپري ۾ سنڌي ادبي سنگت پاران پروفيسر اجمل ساوند جي قاتلن جي گرفتاري لاءِ حاجي شاد راڄڙ، سهڻو لاشاري ۽ ٻين جي اڳواڻيءَ ۾ احتجاجي مظاهرو ڪري نعريبازي ڪئي وئي.
اڳواڻن چيو ته پروفيسر ڊاڪٽر اجمل ساودن جو قتل سنڌ جي شعور جو قتل آهي، اجمل ساوند ڀوتارڪي نظام ھٿان قتل ٿي ويو، سندس قاتلن کي فوري گرفتار ڪيو وڃي.
هنن چيو ته قبيلائي جھيڙن سنڌ جو امن تباھ ڪري ڇڏيو آھي، سوين ڪونڌر بيڏوھي مارجي ويا پر سرڪار جي ڪن تي جونءَ به نه چري آهي.
سندن چوڻ هو ته قبيلائي سردارن خوني جھيڙن جا جرڳا ڪري قاتلن کي خون معاف ڪرڻ جو ڪڌو رواج وڌو جنھن سان قبيلائي جھيڙن ۾ تيزي آئي.
اڳواڻن اعليٰ اختيارين کان مطالبو ڪيو ته ڊاڪٽر اجمل ساوند جي قاتلن کي گرفتار ڪري وارثن سان انصاف ۽ سنڌ ۾ پکڙيل بيچيني ختم ڪئي وڃي.
