لاهور جي دهشتگردي ٽوڙ عدالت پنجاب جي اڳوڻي وڏي وزير پرويز الاهي جي ضمانت 11 مئي تائين منظور ڪندي گرفتار ڪرڻ کان روڪي ڇڏيو آهي.
دهشتگردي ٽوڙ عدالت جي جج اعجاز احمد بٽر پوليس تي پيٽرول بم اڇلائڻ ۽ سرڪاري ڪم ۾ مداخلت بابت ڪيس ۾ پرويز الاهي جي ضمانت بابت درخواست جي ٻڌڻي ڪئي.
ٻڌڻي دوران پنجاب جو اڳوڻو وڏو وزير پرويز الاهي ۽ ٻيا عدالت ۾ پيش ٿيا.
پرويز الاهي موقف اختيار ڪيو ته غالب مارڪيٽ پوليس تي حملو ڪرڻ جو الزام بي بنياد آهي، پوليس سياسي انتقام جو نشانو بڻائڻ لاءِ ڪوڙو ڪيس داخل ڪيو.
پرويز الاهي اپيل ڪئي ته ٽرائل جي قطعي فيصلي تائين گرفتاريءَ کان اڳ واري ضمانت منظور ڪئي وڃي.
عدالت پنجاب جي اڳوڻي وڏي وزير پرويز الاهي جي ضمانت 11 مئي تائين منظور ڪندي کيس 50 هزار رپين جا ڪاغذ جمع ڪرائڻ جو حڪم ڏئي ڇڏيو.
عدالت پوليس کي پرويز الاهي کي گرفتار ڪرڻ کان روڪي ڇڏيو.
ياد رهي ته پرويز الاهي ۽ ٻين خلاف غالب مارڪيٽ ٿاڻي تي پوليس تي پيٽرول بم اڇلائڻ ۽ سرڪاري ڪم ۾ مداخلت جو ڪيس داخل آهي.
