اليڪشن ڪميشن جو فيصلو ڪالعدم، سپريم ڪورٽ پنجاب ۽ ڪي پي ۾ 14 مئي تي چونڊ ڪرائڻ جو حڪم

سپريم ڪورٽ جي ٽه رڪني بينچ پنجاب ۽ ڪي پي ۾ 8 آڪٽوبر تي عام چونڊون ڪرائڻ واري اليڪشن ڪميشن جي فيصلي کي ڪالعدم قرار ڏيندي پنجاب ۾ 14 مئي تي اليڪشن ڪرائڻ جو حڪم ڏئي ڇڏيو آهي.

چيف جسٽس عمر عطا بنديال جي سربراهيءَ ۾ قائم ٽه رڪني بينچ پنجاب ۽ ڪي پي ۾ اليڪشن 8 آڪٽوبر تي ڪرائڻ واري اليڪشن ڪميشن جي فيصلي خلاف پي ٽي آءِ جي درخواستن تي محفوظ ڪيل فيصلو ٻڌايو آهي.

سپريم ڪورٽ پنهنجي فيصلي ۾ اليڪشن ڪميشن جي 8 آڪٽوبر تي اليڪشن ڪرائڻ واري 22 مارچ جي حڪمنامي کي غير آئيني قرار ڏيندي چيو ته اليڪشن ڪميشن پنهنجا اختيار اورانگهيا آهن.

فيصلي ۾ ڄاڻايو ويو آهي ته اليڪشن ڪميشن جو 22 مارچ واري فيصلي کي غير آئيني قرار ڏيندي صدر مملڪت طرفان ڏنل اليڪشن جي تاريخ کي بحال ڪيو وڃي ٿو.

فيصلي موجب آئين ۽ قانون چونڊون ملتوي ڪرڻ جو اختيار نٿو ڏي، اليڪشن ڪميشن 22 مارچ تي پنهنجو فيصلو ٻڌايو، ان وقت چونڊ عمل پنجين مرحلي تي هو، اليڪشن ڪميشن جي آرڊر سبب 13 ڏينهن ضايع ٿي ويا، اليڪشن ڪميشن غير آئيني فيصلو ڪيو.

اعليٰ عدالت قرار ڏنو ته اليڪشن ڪميشن طرفان پنجاب جي ملتوي ڪيل اليڪشن جي اڳ ۾ جاري ٿيل شيڊول تي عمل ٿيندو، جڏهن ته خيبر پختونخوا بابت صورتحال ڏسي مناسب فورم تي فيصلو ڪيو ويندو.

عدالتي فيصلي موجب رٽرننگ آفيسر جي فيصلي خلاف اپيلون جمع ڪرائڻ جي آخري تاريخ 10 اپريل تي ٿيندي، 17 اپريل تي اليڪشن ٽربيونل اپيلن تي فيصلو

سپريم ڪورٽ پنهنجي فيصلي ۾ پنجاب ۾ اليڪشن لاءِ وفاقي حڪومت کي ڏهين اپريل تائين 20 ارب رپيا جاري ڪرڻ جو پڻ حڪم ڏنو، جڏهن ته اليڪشن ڪميشن کي فنڊن جي صورتحال بابت رپورٽ 11 اپريل تي سپريم ڪورٽ ۾ جمع ڪرائڻ جو پڻ هڪم ڏنو.

اعليٰ عدالت جو فيصلي ۾ چوڻ هو ته جيڪڏهن فنڊ فراهم نه ڪيا ويا ته عدالت خاص حڪم جاري ڪندي.

سپريم ڪورٽ پنجاب جي نگران سرڪار، چيف سيڪريٽري ۽ آءِ جي کي اليڪشن جو سڪيورٽي پلان ڏهين اپريل تائين  اليڪشن ڪميشن وٽ جمع ڪرائڻ جي تاڪيد ڪندي چيو ته وفاقي حڪومت پنهنجي ماتحت سڪيورٽي ادارن فوج، رينجرز، ايف سي ۽ ٻي فورس بابت سڪيورٽي پلان 17 اپريل تائين اليڪشن ڪميشن کي فراهم ڪري.

سپريم ڪورٽ فيصلي ۾ اِهو پڻ قرار ڏنو ته وفاقي سرڪار ۽ پنجاب جي نگران حڪومت اليڪشن ڪميشن کي مدد فراهم ڪرڻ ۾ ناڪام وڃن ته اليڪشن ڪميشن اِن بابت به سپريم ڪورٽ کي آگاهه ڪري.

سپريم ڪورٽ اِها پڻ وضاحت ڪئي آهي ته شروعاتي فيصلو پنج رڪني بينچ جو هو، جنهن ۾ ٽن ججن فيصلو ڏنو، جڏهن ته ٻن ججن اختلافي نوٽ ڏنو.