فوج ۾ زوريءَ کڻڻ جي ڊپ ۾ فرار ٿيل پنج روسي شهري ڏکڻ ڪوريا جي ايئرپورٽ تي ڦاسي پيا ۽ پنج مهينا ايئرپورٽ اندر رهڻ تي مجبور ٿي ويا.
روسي صدر ولادمير پيوٽن طرفان ملڪ جي مردن کي فوج ۾ ڀرتي ڪرڻ جي اعلان کانپوءِ ملڪ مان فرار ٿي ڏکڻ ڪوريا پهتل 5 روسي شهري سخت قانون سبب ايئرپورٽ کان ٻاهر ئي نه نڪري سگهيا.
ڏکڻ ڪوريا جي انصاف واري وزارت طرفان سندن پناهه واري درخواست رد ڪرڻ سبب هو ايئرپورٽ کان ٻاهر قدم ئي نه رکي سگهيا.
اِهي پنج ئي ماڻحو ايئرپورٽ جي فرش تي سمهندا هئا ۽ عملي پاران ڏنل کاڌ خوراڪ مان پيٽ ڀريندا هئا.
پنجن مان ٻن کي ايئرپورٽ کان ٻاهر هڪ حڪومتي مرڪز ۾ منتقل ڪيو ويو آهي، باقي ٽي اڃا تائين ايئرپورٽ اندر ئي ڦاٿل آهن.
حڪومتي مرڪز ۾ منتقل ٿيل شخص جو چوڻ آهي ته کيس اجازت وٺي مرڪز مان نڪرڻو پوندو ۽ شام ڇهين وڳي تائين واپس ٿيڻ ضروري هوندو، کيس ڪم ڪرڻ جي اجازت نه هوندي، ڪورونا جي ٽيسٽ به پنهنجن پيسن سان ڪرائڻي پوندي.
اِهو شخص روس ۾ پنهنجي گهرواري ۽ ستن سالن جي پٽ کي ڇڏي آيو ۽ چوي ٿو ته موجوده صورتحال به فوج جو حصو بڻجڻ کان بهتر آهي…
