پي ٽي آءِ اڳواڻ اسد عمر چيو آهي ته پهريان هي عمران خان کان ڊڄندا هئا، هاڻي عوام کان به ڊڄي رهيا آهن، سپريم ڪورٽ جو فيصلو بلڪل واضح آهي، خميس ڏينهن پارليامينٽ جي اقليت فيصلو ڪيو، اقليت هڪ غير آئيني ٺهراءُ پاس ڪيو، سڄو ملڪ جلد چونڊن طرف ويندو، ملڪ ۾ آئين جي حڪمراني برقرار رهندي، فيصلو عوام کي ڪرڻو آهي ۽ اهو حق عوام کان ڪير به کسي نٿو سگهي، ملڪ ۾ اڄ مهانگائي جي شرح 45 سيڪڙو تي پهچي وئي آهي.
لاهور ۾ ميڊيا سان ڳالهائيندي اسد عمر چيو ته پهريان هي عمران خان کان ڊڄندا هئا، هاڻي عوام کان به ڊڄي رهيا آهن، کين ملڪ جي عوام کي منهن ڏيڻو پوندو.
سندس چوڻ هو ته خميس ڏينهن پارليامينٽ جي اقليت فيصلو ڪيو، اقليت هڪ غير آئيني ٺهراءُ پاس ڪيو، 342 جي ايوان مان رڳو 42 ميمبرن جون صحيحون آهن، سپريم ڪورٽ جو فيصلو بلڪل واضح آهي، اميد آهي سمورا ادارا سپريم ڪورٽ جي فيصلي تي عمل ڪندا.
پي ٽي آءِ اڳواڻ اسد عمر چيو ته امپورٽيڊ حڪومت جي خواهش آهي ته هي ڪنهن نه ڪنهن طريقي سان اقتدار سان چنبڙيل رهن، فيصلو عوام کي ڪرڻو آهي ۽ اهو حق عوام کان ڪير به کسي نٿو سگهي.
هن چيو ته سڄو ملڪ جلد چونڊن طرف ويندو، ملڪ ۾ آئين جي حڪمراني برقرار رهندي.
پي ٽي آءِ اڳواڻ اسد عمر چيو ته عمران خان جي دور ۾ مهانگائي جي شرح 12 سيڪڙو هئي، ملڪ ۾ اڄ مهانگائي جي شرح 45 سيڪڙو تي پهچي وئي آهي، عمران خان چاهي ٿو ادارا مضبوط ٿين ۽ سمورا ادارا پنهنجي حدن ۾ رهي ڪم ڪن.
