ڪنڌڪوٽ جي دراني مهر جي ڪچي واري علائقي ۾ٽي ڏينهن اڳ پوليس ۽ ڌاڙيلن وچ ۾ مقابلي دوران ايس ايڇ او عبداللطيف ميراڻي جي شهيد ٿيڻ ۽ ڊي ايس پي سميت پوليس اهلڪارن جي زخمي ٿيڻ واري واقعي جا 2 ڌار ڌار ڪيس داخل ڪيا ويا آهن.
پوليس جي فرياد تي خادو گينگ، نواب جاگيراڻي گينگ، ارسلا سبزوئي گينگ ۽ سندن ساٿين تي دراني مهر ٿاڻي ڪيس داخل ڪيا ويا آهن.
ڪيسن ۾ 40 سڃاتل ۽ 70 اڻڄاتل جوابدار نامزد ڪيا ويا آهن، ٻنهي ڪيسن ۾ قتل، ارادي قتل ۽ دهشتگردي سميت ٻيا قلم شامل ڪيا ويا آهن.
واضح رهي ته ايس ايس پي عرفان سمون جي حڪم تحت پوليس دراني مهر واري علائقي ۾ مبينا طور اغوا ٿي ويل 18 مغوين جي بازيابي لاءِ آپريشن ڪيو هو، ڏوهارين جي جوابي فائرنگ ۾ ايس ايڇ او عبدالطيف ميراڻي شهيد ٿي ويو هو جڏهن ته ڊي ايس پي ۽ اهلڪار زخمي ٿيا هئا.
