ايڇ بي ايل پي ايس ايل (پاڪستان سپر ليگ) جي 21هين ميچ ۾ ڪوئيٽا گليڊيئيٽرز اسلام آباد يونائيٽيڊ کي کٽڻ لاءِ 180 رنسن جو ٽارگيٽ ڏنو آهي.
راولپنڊي ڪرڪيٽ گرائونڊ ۾ کيڏي ويندڙ ميچ ۾ ڪوئيٽا گليڊي ايٽرز جي طرفان ياسر خان ۽ ول سميد اننگز جي شروعات ڪئي پر ول سميد بغير ڪو رنسون ٺاهي آئوٽ ٿي ويو، ياسر خان به 5 رنسون ٺاهي مهمان ثابت ٿيو جڏهن ته ڪپتان سرفراز احمد به 5 رنسون ٺاهي آئوٽ ٿيو. مبصر خان بائونڊري تي شاندار ڪيچ ڪري پويلين جو رستو ڏيکاريو.
افتخار احمد به 17 جي مجموعي اسڪور تي صرف 2 رنسون ٺاهي آئوٽ ٿي ويو، 4 وڪيٽون جلد گرڻ بعد محمد نواز ۽ نجيب الله زدران وچ ۾ 104 رنسن جي پارٽنرشپ قائم ٿي ۽ محمد نواز 52 رنسون ٺاهي آئوٽ ٿي ويو.
نجيب الله زدران به 59 رنسن جي سٺي اننگز کيڏڻ کان پوءِ آئوٽ ٿي ويو پر عمر اڪمل اچي ئي ڇڪن جي برسات ڪري ڇڏي ۽ صرف 14 بالن تي 5 ڇڪن ۽ 2 چوڪن جي مدد سان 43 رنسون ٺاهي ٽيم جو اسڪور 179 رنسن تائين پهچايو. . .
اسلام آباد طرفان فضل حق فاروقي 3، فهيم اشرف 2 ۽ رومان رئيس 1 رانديگر کي آئوٽ ڪيو.
ان کان اڳ اسلام آباد جي ڪپتان شاداب خان ٽاس کٽي پهريان بالنگ جو فيصلو ڪيو.
شاداب خان چيو ته اسان هدف حاصل ڪرڻ چاهيون ٿا ان ڪري پهريان بالنگ ڪنداسين، ٽيم ۾ ٻه تبديليون ڪيون ويون آهن، رحمان الله گربز ۽ فضل حق فاروقي جي واپسي ٿي آهي.
ياد رهي ته اسلام آباد يونائيٽيڊ ٽيم ٽورنامينٽ ۾ هن وقت تائين 6 مان 4 ميچن ۾ ڪاميابي حاصل ڪئي آهي.
اسلام آباد يونائيٽيڊ پنهنجي آخري ميچ ۾ اعظم خان ۽ فهيم اشرف جي ذميواراڻي بيٽنگ جي بدولت ڪراچي ڪنگز کي شڪست ڏني هئي.
