پي ٽي آءِ اڳواڻ فواد چوڌريءَ جي گرفتاريءَ تي پي ٽي آءِ طرفان رد عمل اچڻ شروع ٿي ويو آهي.
پي ٽي آءِ جي وائيس چيئرمين شاهه محمود قريشي چيو آهي ته فواد چوڌري جي وارنٽ کان سواءِ گرفتاري جمهوريت کي زوردار چماٽ برابر آهي.
سندس چوڻ هو ته فواد جو ڪهڙو ڏوهه آهي؟ ڪهڙي ڏوهه تحت کيس کنيو ويو آهي.
شاهه محمود قريشي جو چوڻ هو ته خدارا پاڪستان خلاف راند بند ڪئي وڃي، ٻي صورت ۾ حالتون ڪنهن جي به ڪنٽرول ۾ نه اينديون، پي ٽي آءِ اڳواڻ فرخ حبيب جو چوڻ هو ته اليڪشن ڪميشن آئينو ڏيکارڻ تي برو مڃي ورتو.
سندس چوڻ هو ته اليڪشن ڪميشن ڌر بڻيل آهي جڏهن اسان مٿس تنقيد ڪريون ٿا ته ايف آءِ آر ۽ گرفتاريون شروع ڪري ڇڏي ٿي، کيس ان جو حساب ڏيڻو پوندو.
پي ٽي آءِ اڳواڻ شيري مزاري جو چوڻ هو ته دهشتگرد آزاد گهمي رهيا آهن پر سياسي مخالف گرفتار ٿي رهيا آهن.
پي ٽي آءِ اڳواڻ شبلي فراز جو چوڻ هو ته فواد چوڌري جي گرفتاري هن حڪومت جي بزدليءَ جو دليل آهي.
حسان خاور جو چوڻ هو ته پي ٽي آءِ جي سڀ کان بهادر اڳواڻ کي اغوا ڪيو ويو آهي.
