سڌ سماءَ واري وفاقي وزير مريم اورنگزيب چيو آهي ته اتحادي حڪومت صحافت جي آزاديءَ تي يقين رکي ٿي، پي ٽي آءِ جو چئن ورهين وارو دور صحافين لاءِ خطرناڪ دور هو.
صحافت جي عالمي ڏهاڙي تي جاري ڪيل بيان ۾ مريم اورنگزيب چيو ته پاڪستان سميت سڄي دنيا ۾ صحافت جي آزاديءَ جو ڏهاڙو ملهايو پيو وڃي، پاڪستان جو آئين صحافت جي آزادي ۽ شهرين تائين صحيح ڄاڻ جي پهچ واري حق جي ضمانت ڏي ٿو.
هن چيو ته اڄوڪي ڏينهن هوءَ انهن صحافين کي ڀيٽا پيش ڪرڻ چاهي، جن سچ جي ڳولا ۾ پنهنجون حياتيون وڃايون، 2018ع کان 2022ع تائين صحافت ڏکي دور مان گذري، پي ٽي آءِ دور ۾ پراسرار سينسرشپ جاري رهي.
مريم اورنگزيب چيو ته 2017ع ۾ پاڪستان ورلڊ پريس فريڊم انڊيڪس ۾ پاڪستان 139 نمبر تي هو، پي ٽي آءِ دور ۾ درجا بندي ۾ 12 پوائنٽ گهٽتائي ٿي.
سڌ سماءَ واري وفاقي وزير چيو ته عمران خان نه رڳو صحافين جو آواز بند ڪيو پر سندن قلم به ٽوڙيا، کين اغوا ڪيو، پيٽ ۾ گوليون هنيون، پي ٽي آءِ جو چئن ورهين وارو دور صحافين لاءِ خطرناڪ دور هو.
