پي ٽي آءِ حڪومت سان ڳالهين دوران جولاءِ ۾ چونڊن سميت ٽي شرط رکي ڇڏيا، حڪومت ۽ تحريڪ انصاف وچ ۾ پهريون دور ختم ٿي ويو اڄ ٻيهر ڳالهيون ٿينديون.
عمران خان طرفان جوڙيل پي ٽي آءِ جي ٽي رڪني ڳالهين واري ڪميٽيءَ شاهه محمود قريشي جي صدارت هيٺ حڪومت سان ڳالهين لاءِ پارليامينٽ هائوس پهتي، پي ٽي آءِ وفد ۾ فواد چوڌري ۽ سينيٽر علي ظفر شامل آهن.
حڪومتي وفد ۾ پ پ اڳواڻ يوسف رضا گيلاني، اسحاق ڊار، نويد قمر، خواجه سعد رفيق، اعظم نذير تارڙ، اياز صادق ۽ اسيمبلي ميمبر ڪشور زهرا شامل هئا.
ڳالهين دوران اليڪشن جي تاريخ سميت ٻين معاملن تي غور ڪيو ويو.
ڳالهين دوران پي ٽي آءِ طرفان ٽي شرط رکيا ويا.
پي ٽي آءِ طرفان چيو ويو ته هلندڙ سال مئي ۾قومي ۽ ٻئي صوبائي اسيمبليون ٽوڙيون وڃن، 14مئي کانسواءِ گڏ چونڊن لاءِ آئين ۾ ترميم ڪئي وڃي، آئيني ترميم لاءِ تحريڪ انصاف جون استعيفائون واپس وٺڻيون پونديون.
ڳالهين بعد ميڊيا سان ڳالهائيندي پي ٽي آءِ اڳواڻ شاهه محمود قريشي چيو ته حڪومت آڏو پنهنجو موقف ڀرپور انداز ۾ رکيو، آئين کان مٿانهون حل ممڪن ناهي، اڄ ٻيهر ڳالهيون ٿينديون.
يوسف رضا گيلاني چيو ته حڪومت طرفان ڪابه ڊمانڊ ناهي، پي ٽي آءِ جا مطالبا قيادت آڏو رکيا ويندا، جنهن بعد فيصلو ڪيو ويندو.
