پي ڊي ايم سربراهه مولانا فضل الرحمان چيو آهي ته پي ٽي آءِ سان ڪنهن به ڳالهين نه ڪرڻ واري موقف تي هو قائم آهن، سپريم ڪورٽ ۾ ٿيل ٻڌڻي دوران عدالت جو ورتاءُ تبديل نظر آيو، آدمشماريءَ تي خدشا آهن، جنهن بابت حڪومت کي آگاهه ڪيو.
اسلام آباد ۾ پارٽي جي مرڪزي شوريٰ جي اجلاس بعد پريس ڪانفرنس ڪندي مولانا فضل الرحمان چيو ته حڪومت آڏو موقف پيش ڪيو آهي ته هو پي ٽي آءِ سان ڳالهين جي حق ۾ ناهن، جنهن تي وزيراعظم سينيٽ جي سطح تي ڪميٽي ٺاهڻ ۽ اتي ئي ڳالهائڻ جي تجويز ڏني پر هو ڪنهن به سطح تي ڳالهين جو حصو نه بڻجندا.
هن چيو ته ملڪي تاريخ ۾ هيل تائين عام چونڊون گڏ ٿينديون رهيون آهن، عدالت ڇو نوي ڏينهن ۾ ڦاسي پئي آهي؟ پنجاب ۾ جيڪا پارٽي کٽيندي اها ئي وفاق ۾ حڪومت ٺاهيندي.
مولانا فضل الرحمان چيو ته سپريم ڪورٽ ۾ ٿيل ٻڌڻي دوران عدالت جو ورتاءُ تبديل نظر آيو.
جي يو آءِ سربراهه چيو ته آدمشماريءَ تي خدشا آهن، حڪومت کي چيو ته ڊجيٽل طريقيڪار درست ناهي، لسٽن تي چونڊون ٿيڻيون آهن، مشين ذريعي چونڊون به ڪرايون ويون، نتيجا سڀني آڏو آهن.
مولانا فضل الرحمان چيو ته جي يو آءِ جلد سڄي ملڪ ۾ عوامي رابطا مهم شروع ڪندي.
