پي ٽي آءِ چيئرمين عمران خان جي گرفتاريءَ ملڪ جي مختلف شهرن ۾ احتجاجي مظاهرا ڪيا ويا، امن امان جي صورتحال برقرار رکڻ لاءِ پنجاب ۽ بلوچستان ۾ قلم 144 لاڳو ڪري پنجاب ۾ موبائل فون سروس بند ڪئي وئي آهي، جڏهن ته خانگي اسڪول ايسوسيئشن پاران سڀاڻي اسڪول بند رکڻ جو اعلان ڪيو ويو آهي.
لاهور ۾ پي ٽي آءِ ڪارڪنن ڪينال روڊ ٻنهي طرفن کان بند ڪري احتجاجي مظاهرو ڪيو ويو، جڏهن ته زمان پارڪ جو ڪنٽرول به پي ٽي آءِ ڪارڪنن سنڀالي ورتو، ٺنڊي سرڊ ۽ جيل روڊ تي به احتجاجي مظاهر ڪيو ويو.
راولپنڊي ۾ مري روڊ تي پي ٽي آءِ ڪارڪنن پاران احتجاجي مظاهرو ڪيو ويو، جنهن دوران ڪارڪنن اهلڪارن وچ ۾ چڪريون پڻ ٿيون.
فيصل آباد ۾ پي ٽي آءِ ڪارڪنن وفاقي گهرو وزير راڻا ثناءُ الله جي اوطاق جو گهيراءُ ڪيو، ملتان ۾ پي ٽي آءِ ڪارڪنن بهاولپور باءِ پاس چوڪ تي ڀڃ ڊاهه ڪري چوڪ تي لڳل بينر ۽ پينافليڪس ڦاڙي ڇڏيا.
گجرانوالا ۾ پي ٽي آءِ طرفان احتجاجي مظاهرو ڪيو ويو، گجرات، خانپور، ۽ ٻين شهرن ۾ احتجاجي مظاهرا ڪيا ويا.
پنجاب ۾ موبائل فون ۽ انٽرنيٽ سروس به بند ڪئي وئي آهي.
پشاور ۾ پي ٽي آءِ ڪارڪنن اسيمبلي چوڪ تي احتجاجي مظاهرو ڪيو، خيبر روڊ تي چاغي جبل جي ماڊل کي پي ٽي آءِ ڪارڪنن باهه ڏئي ڇڏي، ڪرڪ ۾ عمران خان جي گرفتاريءَ خلاف مرڪزي شاهراهه انڊس هاءِ وي کي ٽن هنڌن تي بلاڪ ڪيو ويو.
بلوچستان جي گادي واري شهر ڪوئيٽا ۾ عمران خان جي گرفتاريءَ خلاف پي ٽي آءِ ڪارڪنن طرفان احتجاجي مظاهرو ڪري نعريبازي ڪئي وئي.
آزاد ڪشمير، مظفرآباد ۽ ٻين علئاقن ۾ به پي ٽي آءِ ڪارڪنن پاران احتجاجي مظاهرا ڪيا ويا.
پرائيويٽ اسڪولز ايسوسيئيشن پاران سڀاڻي سڄي ملڪ ۾ اسڪول بند ڪرڻ جو اعلان ڪيو آهي.
