ٽوئٽر جو مالڪ ايلون مسڪ پاڻ کي اظهار جي آزادي جو حامي قرار ڏئي ٿو ۽ سوشل ميڊيا نيٽ ورڪ کي به اهو ئي چئي خريد ڪيو پر هن ڀارت جي آڏو گوڏا کوڙي ڇڏيا آهن.
برطانوي خابرو اداري کي انٽرويو ڏيندي ايلون مسڪ چيو ته ڀارت ۾ سوشل ميڊيا جي حوالي سان قانون گهڻو سخت آهي ۽ ڪمپني ان جي ڀڃڪڙي نه ٿي ڪري سگهي.
انٽرويو دوران ايلون مسڪ کان سوال ڪيو ويو ته ڀارت ۾ ٽوئٽر جي طرفان گجرات ڏڦيڙ جي حوالي سان بي بي سي جي ڊاڪومينٽري کي بلاڪ ڇو ڪيو ويو ؟
ايلون مسڪ جواب ڏنو ته هو ان صورتحال کان آگاهه نه آهي، هو نه ٿو ڄاڻي ته ڀارت ۾ ڇا ٿيو پر اهو معلوم آهي ته ڀارت ۾ سوشل ميڊيا جي حوالي سان قانون گهڻا سخت آهن ۽ هو ڪنهن ملڪ جي قانون جي ڀڃڪڙي نه ٿا ڪري سگهن.
هن چيو ته جيڪڏهن کين چيو وڃي ته پنهنجي ماڻهن کي جيل موڪليندا يا قانون تي عملدرآمد مان ڪنهن کي چونڊيندا ته هو قانون تي عمل کي ترجيح ڏيندا.
ٽوئٽر ڪيترائي ڀيرا ڀارتي حڪومت جي حڪمن سامهون ڪنڌ جهڪايو آهي، خاص طور تي ايلون مسڪ جي ملڪيت ۾ وڃڻ بعد مواد هٽائڻ جي درخواستن تي ڪا به مزاحمت نه ڪئي ويندي آهي.
ڀارت جي 2021ع جي آءِ ٽي قانون تحت جيڪڏهن ڪمپني حڪومتي هدايتن تي عملدرآمد کان انڪار ڪري ٿي ته ان کي سوشل ميڊيا پليٽ فارم تي شيئر ٿيندڙ مواد کي حاصل قانوني ڇوٽ برقرار نه رهندي.
ڀارتي قانون جي ڀڃڪڙي تي ڪمپني جي عهديدارن کي فوجداري ڪيسن ۽ جيل جي سزا جو منهن ڏسڻو پئجي سگهي ٿو…….
