سنڌ جي اطلاعات کاتي واري وزير شرجيل انعام ميمڻ چيو آهي ته صدر عارف علوي جي ٽياڪڙي ۾ عمران خان ۽ جنرل باجوه جي گڏجاڻي تي پاڻمرادو نوٽيس وٺڻ گهرجي، ثاقب نثار تحريڪ انصاف جي ٽائيگر فورس جي ڪارڪن جو ڪردار ادا ڪندو رهيو آهي، ڪجهه ماڻهو انصاف جا بخيا اڊيڙي نظام تي سواليه نشان بڻيل آهن، عمران خان ٻن صوبن جون اسيمبليون ٽوڙڻ جو غير آئيني حڪم قبول ڪيو، ملڪ ڪنهن به قسم جي مارشل لا برداشت نه ٿو ڪري سگهي.
ڪراچيءَ ۾ سنڌ حڪومت جي ترجمان بئريسٽر مرتضيٰ وهاب سان گڏ پريس ڪانفرنس ڪندي شرجيل انعام ميمڻ چيو ته سپريم ڪورٽ هڪ فرد ناهي اهي سمورا ماڻهو آهن جيڪي هن وقت سپريم ڪورٽ ۾ ويٺل آهن، پاڻمرادو نوٽيس جو اختيار سپريم ڪورٽ وٽ آهي.
سندس چوڻ هو ته هو چاهن ٿا ته ملڪ ۾ غير يقيني واري صورتحال ختم ٿئي، قانون سازي ڪرڻ هڪ عمل آهي، قومي اسيمبلي ۽ سينيٽ قانون سازي ڪندا آهن.
صوبائي وزير شرجيل ميمڻ چيو ته هڪ ڪلاڪ اندر قانون کي معطل ڪيو وڃي ٿو جيڪو اڃا قانون ٺهيو ئي ناهي، اهو به چيو ويندو آهي ته سمورا فيصلا چيف جسٽس ڪندو، روزانو نيون آڊيو ليڪس اچي رهيون آهن، ڪجهه فيصلا ذاتي پسند ۽ ڪجهه ڊڪٽيشن تي هٿا هئا، ڇا ثاقب نثار جا ڪيل فيصلا واپس نه ٿيڻ گهرجن.
هن چيو ته ثاقب نثار تحريڪ انصاف جي ٽائيگر فورس جي ڪارڪن جو ڪردار ادا ڪندو رهيو آهي، ڪجهه ماڻهو انصاف جا بخيا اڊيڙي نظام تي سواليه نشان بڻيل آهن.
سندس چوڻ هو ته ايوان صدر ۾ اڳوڻي وزيراعظم جي آرمي چيف سان ملاقات ڪرائي وئي، آگسٽ ۾ عمران خان جي ايوان صدر ۾ جنرل باوجود سان ملاقات ٿي هئي.
سنڌ جي اطلاعات کاتي واري وزير شرجيل انعام ميمڻ چيو ته ڇا ايوان صدر سازشن جو ڳڙهه بڻجي ويو هو ته يا اڄ تائين ائين هلي رهيو آهي، آگسٽ کان اڳ عمران خان جنرل باجوه تي الزام لڳائي چڪو هو، ان شخص فوج ۽ عدليا کي بدنام ڪرڻ جي ڪوشش ڪئي هاڻي ملڪ کي نشانو بڻائي رهيو آهي.
سندس چوڻ هو ته آئيني ادارن جي ڪم جون شيون قوم جي سامهون اچي رهيون آهن، پردو کڄڻ شروع ٿيو آهي ته شڪ شبا پيدا ٿي رهيا آهن.
صوبائي وزير شرجيل انعام ميمڻ چيو ته ثاقب نثار جيترا پاڻمرادو نوٽيس ورتا انهن سمورين ڳالهين بعد سوال ٺهن ٿا، سندس آڊيو ليڪ ٿي رهيون آهن، جج ڪيئن ڪنهن کي چئي سگهي ٿو ته هي فيصلو پڙهو، ڇا غيرقانوي طور تي اسيمبليون ٽوڙڻ ٺيڪ هو.
سنڌ حڪومت جي ترجمان بئريسٽر مرتضيٰ وهاب چيو ته ملڪ ۾ آئين ۽ قانون تحت فيصلا ٿيڻ گهرجن، فيصلو ڪرڻو پوندو ته قانونسازي پارليامينٽ ۾ ٿيندي يا وري ڪنهن ٻئي هنڌ.
سندس چوڻ هو ته آئين جي ڪنهن شق کي تبديل نه ٿو ڪري سگهي، قانونسازي ڪرڻ پارليامينٽ جو اختيار آهي.
سنڌ حڪومت جي ترجمان مرتضيٰ وهاب چيو ته ڇا ججن جو احتساب نه ٿيڻ گهرجي؟، سياستدانن ۽ بيورو ڪريٽس جو احتساب ٿيندو آهي اڄ تائين ڪنهن به معزز جج خلاف ڪارروائي ناهي ڪئي وئي.
