پي ٽي آءِ سان تعلق رکندڙ ۽ آزاد ڪشمير جي قانون ساز اسيمبلي جو اسپيڪر چوڌري انوار الحق آزاد ڪشمير جو بنا مقابلي وزيراعظم چونڊجي ويو، کيس 52 ميمبرن جي ايوان ۾ 48 ووٽ مليا، جنهن کانپوءِ کيس آزاد ڪشمير قانون ساز اسيمبلي جي تاريخ جو سڀ کان وڏو مينڊيٽ مليو.
آزاد ڪشمير قانون ساز اسيمبلي جو هنگامي اجلاس اربع ۽ خميس جي وچ واري رات ٿيو.
آزاد ڪشمير اسيمبلي جي سيڪريٽري موجب حڪومت طرفان ڪنهن به نامزدگي ڪاغذ جمع نه ڪرايا، جنهن کانپوءِ اسپيڪر انور الحق کي بنا مقابلي وزيراعظم چونڊيو ويو.
آزاد ڪشمير اسيمبلي جي سيڪريٽري جو چوڻ هو ته بنا مقابلي چونڊ کانپوءِ به ووٽنگ جو عمل ٿيندو.
آزاد ڪشمير قانون ساز اسيمبلي جو هنگامي اجلاس ڪجهه دير لاءِ ملتوي ڪيو ويو پر ڪجهه دير کانپوءِ ڊپٽي اسپيڪر چوڌري رياض جي صدارت هيٺ ووٽنگ شروع ٿي.
ووٽنگ ۾ 52 جي ايوان مان پي ٽي آءِ سان تعلق رکندڙ چوڌري انوار الحق جي حمايت ۾ 48 ووٽ ڪاسٽ ٿيا، آزاد ڪشمير جي وزيراعظم جي چونڊ ۾ پي ٽي آءِ جي ٻن ميمبرن حصو نه ورتو، جڏهن ته پ پ آزاد ڪشمير جي سردار حسن ابراهيم ۽ مسلم ڪانفرنس جي سردار عتيق ووٽنگ جي عمل ۾ حصو نه ورتو.
انوار الحق آزاد ڪشمير قانون ساز اسيمبلي جي تاريخ جو سڀ کان وڏو مينڊيٽ حاصل ڪري ورتو.
