پي ڊي ايم سربراهه مولانا فضل الرحمان چيو آهي ته چيف جسٽس سمورن اختيارن تي قبضو ڪري عدالتي مارشل لا لڳائي ڇڏي آهي.
اسلام آباد ۾ پريس ڪانفرنس ڪندي پي ڊي ايم سربراهه مولانا فضل الرحمان چيو ته چيف جسٽس اليڪشن ڪميشن، پارليامينٽ ۽ حڪومت اختيارن تي قبضو ڪري ورتو آهي.
هن چيو ته اليڪشن شيڊيول به ڏنو ويو آهي، سپريم رجسٽرار جي مقرري حڪومت جو اختيار آهي پر چيف جسٽس هوڏ جو مظاهرو ڪندي ان کي روڪي ڇڏيو، هيءَ جڊيشل مارشل لا لاڳو ڪئي وئي آهي.
مولانا فضل الرحمان چيو ته پارليامينٽ قانون منظور ڪندي آهي، هڪ قانون اڃا ٺهيو ئي ناهي پر چيف جسٽس بئنچ ٺاهي ورتي، آئيني طور تي اختيار ورهايل آهن ته پوءِ مداخلت ڇو پئي ڪئي وڃي؟
پي ڊي ايم سربراهه چيو ته ڪنهن اداري کي ٻئي اداري جي اختيار واري دائري ۾ مداخلت نه ڪرڻ گهرجي.
مولانا فضل الرحمان، عمران خان سان ڪنهن به قسم جي ڳالهين جو امڪان رد ڪندي چيو ته عمران خان سياست جو غير ضروري عنصر آهي، ساڻس ڪنهن به صورت ڳالهيون نه ٿينديون.
پي ڊي اي سربراهه چيو ته 2018ع ۾ تڏهوڪي اسٽيبلشمنٽ ڌانڌليءَ ڪرائي رهي هئي.
هڪ سوال جي جواب ۾ مولانا فضل الرحمان پ پ جو پنهنجو فلسفو آهي، هنن اڳ به چيو هو ته اسيمبلين تان استعيفيٰ ڏئي اليڪشن طرف وڌو پر پ پ چيو ته بي اعتمادي رٿ آندي وڃي، جنهن تي اتفاق ڪيو، سندن ڳالهه تسليم ڪئي وڃي ها ته اڄ چونڊون ٿي چڪيون هجن ها.
پي ڊي ايم سربراهه چيو ته موجوده صورتحال ۾ مهانگاي سندن لاءِ ڏکيائي جو سبب بڻجي رهي آهي ۽ عمران خان ان صورتحال مان فائدو وٺي رهيو آهي.
مولانا فضل الرحمان چيو ته سمورين پارٽين ۾ اتفاق آهي ته سموريون اسيمبيلن جون چونڊون گڏ ٿين، ان پوري قومي تصور کي عمران خان لاءِ قربان نه ٿو ڪري سگهجي.
