سنڌ اسيمبليءَ جي اسپيڪر آغا سراج دراني چيو آھي ته ڪنڌڪوٽ ۾ پروفيسر ڊاڪٽر اجمل ساوند جو قتل قبيلائي جھيڙي سبب ٿيو آھي جنھن جي ھو مذمت ڪن ٿا.
ڪراچيءَ جي احتساب عدالت ۾ آمدني کان وڌيڪ ملڪيت ٺاهڻ بابت ريفرنس جي ٻڌڻي ٿي.
ٻڌڻي دوران سنڌ اسيمبليءَ جو اسپيڪر آغا سراج دراني عدالت ۾ پيش ٿيو.
ٻڌڻي دوران جج جاچ آفيسر کان ڪيس جي رڪارڊ بابت پڇاڻو ڪيو.
عدالت جاچ آفيسر کي رڪارڊ پيش نه ڪرڻ تي ڇنڊ پٽيندي چيو تھ ايندڙ ٻڌڻي تي رڪارڊ پيش ڪيو وڃي.
عدالت ريفرنس جي ٻڌڻي 18 اپريل تائين ملتوي ڪري ڇڏي.
ڪراچيءَ جي احتساب عدالت ٻاھران ميڊيا سان ڳالھائيندي آغا سراج دراني چيو ته سال اڳ جج رٽائرڊ ٿيو جنھن بعد سندس ڪيس ناھي ھلي سگھيو.
سندس چوڻ ھو ته سندس ڪيس نھ ھلڻ سبب ضمانت به ناھي ملي سگھي، ھاڻي ڪيس ٻي عدالت ۾ منتقل ٿيو آھي.
سنڌ اسيمبليءَ جي اسپيڪر آغا سراج دراني چيو ته عدالت ۾ موجود جج مان اميد آھي ته سندس خلاف بي بنياد ڪيس ۾ انصاف ڪندو.
ھن چيو تھ سندس ڪيس ۾ ڪجهه به ناھي، نئين قانون موجب ڪيس ٺھي ئي نٿو، ملڪيت سندس وڏڙن جي آھي جنھن سبب ڪيس ٺھي ئي نٿو.
سنڌ اسيمبيليءَ جي اسپيڪر آغا سراج دراني چيو ته ايندڙ ٻڌڻي 18 اپريل ٿيندي جاچ آفيسر رڪارڊ پيش ڪندو، ان کان اڳ نيب سندس خلاف ڪو به رڪارڊ ناھي ڪيو.
سندس چوڻ ھو ته شھيد محترمه بينظير ڀٽو جي فلسفي تي ھلڻ، غريب ۽ بي پھچ ماڻھن خدمت ڪرڻ جي سزا ڏني پئي وڃي.
سنڌ اسيمبليءَ جي اسپيڪر آغا سراج دراني چيو ته نئين قانون ۾ ڪيترائي ماڻھو نيب جي ڪيسن مان آزاد ٿي ويا آھن پر سندس خلاف بي بنياد ڪيس ۾ رلايو پيو وڃي.
