ايس ٽي پي سربراهه ڊاڪٽر قادر مگسي چيو آهي ته ڊجيٽل آدمشماري جو مقصد ڌرتي ڌڻين کي اقليت ۾ تبديل ڪرڻ جي سازش آهي، خدشن کي ختم ڪرڻ کانسواءِ آدم شماري کي قبول نه ڪيو ويندو.
ٽنڊي محمد خان جي پريس ڪلب ۾ آجياڻي ۽ ميٽ دي پريس کي خطاب ڪندي ڊاڪٽر قادر مگسي چيو ته سنڌ ۾ لکين افغاني ، برمي ، بنگالي ، بيهارين سميت غيرقانوني طور آيل پرڏيهن کي آدمشماري کان الڳ رکيو وڃي. هن چيو ته سنڌ ۾ ٻين صوبن جي آباد ماڻهن کي سنڌ جي ڪيل آدمشماري کان الڳ خانو ٺاهي سندن صوبي جي الڳ سڃاڻپ سان ڳڻپ ڪئي وڃي .
سندس چوڻ هو ته سنڌ جي وڏن ننڍن شهرن ڪراچي ، حيدرآباد ، سکر ، ميرپورخاص سميت سڄي سنڌ ۾ ڪيل آدمشماري دوران اصل ڌرتي ڌڻين کي پنهنجي مادري ٻولي جي خاني ۾ سنڌ ٻولي جو لفظ استعمال ڪيو وڃي، سنڌ جي وجود خلاف ٿيندڙ سازش تي سمورين سنڌ دوست قومپرست پارٽين کي هڪ آواز ٿي جدوجهد لاءِ اڳتي وڌڻ گهرجي .
ڊاڪٽر قادر مگسي چيو ته پيپلز پارٽي سنڌ جي عوام جي ڏنل ووٽن سان هميشه ويساهه گهاتي ڪئي آهي هاڻي سنڌ جو ووٽ سنڌ ڪارڊ قومپرست پارٽين ڏانهن تبديل ٿي ويندو، پ پ جي اي پي سي ٿيندڙ آدمشماري ۾ سنڌ جي خدشن کي ختم ڪرائڻ لاءِ ڪو به عملي قدم کڻڻ ۾ ناڪام ثابت ٿي آهي.
هن چيو ته سنڌ جي وڏي وزير سيد مراد علي شاهه کي سنڌ جي خدشن کي تسليم نه ڪرڻ تي ٿيندڙ آدمشماري جو سنڌ حڪومت طرفان بائيڪاٽ جو اعلان ڪرڻ گهرجي.
