آمريڪا ۾ نئين تاريخ رقم ٿي وئي، اڳوڻي صدر ڊونلڊ ٽرمپ تي فرد جرم لاڳو ڪيو ويو جنهن کانپوءِ هو مجرماڻي الزامن کي منهن ڏيندڙ پهريون آمريڪي صدر بڻجي ويو آهي.
آمريڪي ميڊيا موجب، نيويارڪ ۾ مين هٽن گرينڊ جيوري 2016ع جي چونڊ مهم دوران فحش فلمن جي اداڪارا اسٽارمي ڊينيئلز کي معاملا لڪائڻ لاءِ رقم ادا ڪرڻ جي ڪيس ڊونلڊ ٽرمپ تي فرد جرم لاڳو ڪري ڇڏيو.
فرد جرم لاڳو ڪرڻ جو فيصلو جيوري طرفان ووٽنگ کانپوءِ ڪيو ويو، پراسيڪيوٽر آفيس ٽرمپ کي گرفتاريءَ لاءِ پاڻ کي پيش ڪرڻ جو مطالبو ڪيو آهي.
آمريڪي تاريخ ۾ اهو پهريون موقعو آهي ته ڪنهن به موجوده يا اڳوڻي آمريڪي صدر کي ڪرمنل چارجز کي منهن ڏيڻو پوندو.
اڳوڻي آمريڪي صدر ڊونلڊ ٽرمپ الزامن کي مڃڻ کان انڪار ڪري ڇڏيو.
ڊونلڊ ٽرمپ جو چوڻ آهي ته ته ڪارروائي سياسي دشمني آهي، کاٻي ڌر جي ڊيموڪريٽ سندس پويان آهي، هاڻي اهي ماڻهو تصور نه ڪرڻ جوڳي حد تائين پهچي ويا آهن، بيگناهه شخص تي الزام لڳايو ويو آهي،
سندس چوڻ هو ته آمريڪي تاريخ ۾ ڪڏهن به ائين ناهي ٿيو ته انصاف جي نظام کي ڊيموڪريٽس پنهنجو هٿيار بڻائي ورتو آهي ته جيئن سياسي مخالف کي سزا ڏئي سگهجي.
اڳوڻي صدر جي وڪيل علينا حبا چيو آهي ته ٽرمپ آمريڪا جي ڪرپٽ انصاف واري نظام جو شڪار آهي، کيس ضرور بري ڪيو ويندو.
ڊونلڊ ٽرمپ طرفان ايندڙ هفتي پاڻ کي جيوري آڏو پيش ڪرڻ جو امڪان آهي.
ريپبلڪن اڳواڻن ٽرمپ خلاف ڪارروائي کي کيس صدارتي چونڊن کان ٻاهر رکڻ جي سياسي سازش قرار ڏنو آهي.
