ڪراچيءَ ۾ نيو چالي جنريٽر مارڪيٽ ويجهو عمارت ۾ باهه لڳڻ سبب هڪ ڄڻو سڙي فوت ۽ 3 ڄڻا زخمي ٿي پيا، فائر برگيڊ عملو باهه وسائڻ ۾ رڌل آهي جڏهن ته وڏي وزير مراد علي شاهه باهه لڳڻ واري واقعي جو نوٽيس وٺندي باهه تي ضابطو آڻڻ بعد رپورٽ طلب ڪري ورتي.
نيو چالي جنريٽر مارڪيٽ ويجهو رهائشي عمارت ۾ باهه لڳي وئي.
باهه لڳڻ سبب 46 ورهين جو علي اصغر پٽ برهان الدين فوت ٿي ويو جڏهن ته 28 ورهين جو رتي لال، 25 ورهين جو ارسلان ۽ 23 ورهين جو آصف مسيح زخمي ٿي پيا جن کي اسپتال منتقل ڪيو ويو.
فائر برگيڊ عملي موجب، عمارت ۾ مختلف آفيسون آهن جڏهن ته باهه عمارت جي ڏهه ماڙ تي لڳي آهي جڏهن ته پنج فائر ٽينڊر، هڪ اسنارڪل ۽ هڪ واٽر بائوزر باهه وسائڻ ۾ رڌل آهن.
فائر برگيڊ عملي جو چوڻ آهي ته عمارت ۾ موجود ماڻهن کي اسنارڪل جي مدد سان ٻاهر ڪڍيو پيو وڃي.
ايڊمنسٽريٽر ڪراچي ڊاڪٽر سيد سيف الرحمان شاهراهه لياقت تي عمارت ۾ باهه لڳڻ تي افسوس جو اظهار ڪندي چيف فائر آفيسر کان تفصيلي رپورٽ طلب ڪري ورتي.
ايڊمنسٽريٽر ڪراچي ڊاڪٽر سيد سيف الرحمان چيو ته عمارت ۾ موجود ماڻهن کي بچائڻ لاءِ فوري قدم کنيا وڃن ۽ باهه کي عمارت جي ٻئي منزلن تائين پکڙجڻ کان روڪيو وڃي، انساني جان ۽ مال جي حفاظت اهم آهي.
وڏي وزير مراد علي شاهه باهه لڳڻ واري واقعي جو نوٽيس وٺندي باهه تي ضابطو آڻڻ بعد رپورٽ طلب ڪري ورتي.
وڏي وزير مراد علي شاهه، ڪمشنر ڪراچي کي هدايت ڪندي چيو ته باهه وسائڻ لاءِ ضروري قدم کنيا وڃن ۽ ڦاٿل ماڻهن کي ڪڍڻ جا جلد انتظام ڪيا وڃن.
سندس چوڻ هو ته جاني ۽ مالي نقصان کي ڪنٽرول ڪرڻ جي ڪوشش ڪئي وڃي.
وڏي وزير مراد علي شاهه چيو ته ڪوشش ڪئي وڃي ته باهه وڌيڪ نه پکڙجي، باهه تي ضابطو آڻڻ بعد واقعي جي رپورٽ ڏني وڃي.
