ايف آءِ اي جي ڪمرشل بينڪنگ سرڪل ڪراچي جي علائقي عزيز آباد ۾ ڪارروائي ڪندي حواله هـُنڊي نيٽورڪ جي ٻن جوابدارن کي گرفتار ڪري وڏي مقدار ۾ ملڪي ۽ پرڏيهي ڪرنسي هٿ ڪري ورتي.
ايف آءِ اي ترجمان موجب ڊپٽي ڊائريڪٽر ڪمرشل بئنڪنگ سرڪل ڪراچي رابعه قريشي جي هدايتن تي ٽيم ڪارروائي ڪري 2 جوابدارن کي گرفتار ڪري ورتو.
جوابدار بغير لائسنس جي پرڏيهي ڪرنسي جي خريد و فروخت ۾ ملوث هئا، سندن قبضي مان 45 هزار 600 آمريڪي ڊالر، 7 لک 95 هزار رپيا ۽ هـُنڊي جي ڪاروبار جون رسيدون هٿ ڪري ورتيون.
گرفتار جوابدارن ۾ عمير خالد ۽ سڪندر علي شامل آهن، کين علي ڀائي سوسائٽي عزيز آباد مان گرفتار ڪيو ويو.
ايف آءِ اي ترجمان جو وڌيڪ چوڻ آهي ته گرفتار جوابدارن جي موبائيل فونن مان هـُنڊي ڪاروبار۽ غير قانوني ڪرنسي ايڪسچينج بابت ڪيترائي پيغام پڻ هٿ ڪيا ويا، جوابدارن خلاف ڪيس داخل ڪري وڌيڪ جاچ ڪئي پئي وڃي.
