ڪشمور جي ڪچي واري علائقي گيهلپور مان هٿياربند هڪ مغوي نينگر جي پلاند ۾ پنجن نينگرن کي اغوا ڪري ويا جڏهن ته مغوين جي وارثن پاران احتجاجي مظاهرو ڪري هٿياربندن خلاف ڪارروائيءَ جو مطالبو ڪيو ويو.
ڪچي واري علائقي گيهلپور مان هٿياربند هڪ مغوي نينگر جي پلاند ۾ پنجن نينگرن کي مسافر بس مان لاهي اغوا ڪري ويا.
مغوين ۾ مختيار شر، منير شر، اظهر ملڪ دانش ملڪ ۽ ٻيا شامل آهن.
شر برادري پاران حاجي عبدالله شر، الف دين، محبوب شر ۽ ٻين جي اڳواڻيءَ ۾ پريس ڪلب اڳيان احتجاجي مظاهرو ڪري نعريبازي ڪئي وئي.
احتجاج ڪندڙن ميڊيا سان ڳالهائيندي چيو ته مزاري برادري جو هڪ نينگر اغوا ٿيل آهي جنهن سان سندن ڪوبه تعلق ناهي.
هنن چيو ته سندن برادري جا ماڻهو علاج لاءِ ڪشمور اچي رهيا هئا ته هٿياربندن پنجن نينگرن کي بس مان لاهي اغوا ڪري ويا آهن.
احتجاج ڪندڙن اعليٰ اختيارين کان مطالبو ڪيو ته هٿياربندن خلاف ڪارروائي ڪري نينگرن کي بازياب ڪرائي بيچيني ختم ڪئي وڃي.
