ڪنري ۾ گشت ڪندڙ پوليس تي مبينا حملو، اي ايس آءِ ۽ پوليس اهلڪار زخمي ٿي پيا جڏهن ته واقعي جو ڪيس داخل ڪري هڪ جوابدار کي گرفتار ڪيو ويو آهي.
ڳوٺ چيل بند ويجهو گشت ڪندڙ پوليس تي ڪولهي برادري پاران مبينا طور حملو ڪيو ويو.
حملي ۾ اي ايس آءِ عاشق علي چانڊيو ۽ پوليس اهلڪار لال محمد سخت زخمي ٿي ويا.
حملو ڪندڙ جوابدارن ٻنهي اهلڪارن جون ورديون ليڙون ليڙون ڪري ڇڏيون.
زخمين کي تعلقي اسپتال منتقل ڪيو ويو جتي سندن علاج هلندڙ آهي.
ڪنري ٿاڻي تي ڪولهي برادري جي عورتن ۽ مردن سميت ستن جوابدارن خلاف ڪيس داخل ڪيو ويو.
ڪيس ۾ روجي ڪولهي، گلاب ڪولهي، اجي ڪولهي، ڀيمراج، ديوي،گلي ۽ لالي کي نامزد ڪيو ويو آهي.
ڪيس ۾ قاتلاڻي حملي ۽ ڊيوٽي اٽڪاءَ سميت ٻيا قلم شامل ڪيا ويا آهن.
ڪيس جي متن موجب، گشت ڪندڙ پوليس کي جوابدارن روڪي چيو ته هتان ڇو ٿا گشت ڪريو ۽ حملو ڪري ٻن اهلڪارن کي زخمي ڪري ورديون ڦاڙي ڇڏيون.
پوليس جو چوڻ آهي ته ڪيس ۾ نامزد هڪ جوابدار روجي ڪولهي کي گرفتار ڪري ورتو آهي باقي جوابدارن جي گرفتاري لاءِ ڇاپا هنيا پيا وڃن.
