ڀارت، گجرات وڳوڙن ۾ ڀارتي وزيراعظم نريندر موديءَ جي ملوث هجڻ بابت بي بي سي جي ڊاڪيومينٽري تي پابندي لڳائي ڇڏي آهي.
آمريڪي نشرياتي اداري جي رپورٽ موجب ڀارت جي سڌ سماءَ واري وزارت جي هڪ سينيئر صلاحڪار جو چوڻ آهي ته انفرميشن اينڊ ٽيڪنالاجي قانون هيٺ حڪومت کي حاصل هنگامي اختيارن تحت ڊاڪيومينٽري بلاڪ ڪرڻ جون هدايتون جاري ڪيون ويون آهن.
سينيئر صلاحڪار ڪنچن گپتا پنهنجي هڪ ٽوئٽ ۾ چيو آهي ته بي بي سي جي ڊاڪيومينٽري ڀارت خلاف ناڪاري پروپيگنڊا آهي تنهنڪري ان جي لنڪس شيئرنگ بلاڪ ڪئي وئي آهي.
آمريڪي نشرياتي اداري موجب هنن ٽوئٽر ۽ يوٽيوب سان سندن موقف معلوم ڪرڻ لاءِ رابطو ڪيو ويو آهي پر اڃا تائين کين سندن موقف نه ملي سگهيو آهي.
برطانوي نشرياتي اداري 2002ع ۾ ٿيل گجرات وڳوڙن بابت ٻن حصن تي ٻڌل هڪ دستاويزي فلم جاري ڪئي آهي.
“انڊيا: دي مودي ڪوئسچن” جي عنوان هيٺ جاري ٿيل اِن ڊاڪيومينٽري ۾ گجرات وڳوڙن ۾ ڀارتي وزيراعظم نريندر موديءَ کي ملوث قرار ڏنو آهي.
گجرات ۾ ٽرين ڌماڪي ۾ هندو برادريءَ جا درجنين ماڻهو مارجڻ کانپوءِ حملي جو الزام مسلمانن تي هنيو ويو هو، جنهن کانپوءِ هندو مسلمان وڳوڙ شروع ٿي ويا هئا.
هندو برادريءَ جي ماڻهن مسلمانن جي گهرن ۽ دڪانن تي حملا ڪري ڏنا، جنهن جي نتيجي ۾ مسلمانن جي اڪثريت سميت هڪ هزار ماڻهو اجل جو شڪار ٿيا هئا.
ان وقت گجرات جو وڏو وزير نريندر مودي هو، جيڪو هينئر ڀارت جو ٻيو ڀيرو وزيراعظم چونڊيل آهي.
ڀارت، بي بي سي جي اِن ڊاڪيومينٽريءَ کي ناڪاري پروپيگنڊا قرار ڏئي رد ڪري چڪو آهي.
