آءِ پي ايل ۾ گوتم گمڀير ۽ ويرات ڪوھلي وچ ۾ ٿيل جھيڙي جو ذميوار ڀارتي ميڊيا افغانستان جي بالر نوين الحق کي قرار ڏئي ڇڏيو.
ڀارتي ميڊيا جي رپورٽس ۾ چيو پيو وڃي تھ لکنئو سپر جائنٽس جي افغان فاسٽ بالر نوين الحق ميچ جي دوران پھريان رائل چئلينجز بينگلور جي رانديگر ويرات ڪوھلي سان بدتميزي ڪئي، نوين الحق ماضي ۾ بھ سينيئر ڪرڪيٽرز سان بدتميزي ڪندو رھيو آھي.
رپورٽس ۾ چيو ويو تھ نوين الحق لنڪن پريميئر ليگ جي دوران سريلنڪا جي پريرا، محمد عامر ۽ اڳوڻي ڪرڪيٽر شاھد آفريدي سان بھ بدتميزي ڪري چڪو آھي.
واضح رھي تھ لکنئو سپر جائنٽس جي مينٽور گوتم گھمڀير ۽ اسٽار ڪرڪيٽر ويرات ڪوھلي وچ ۾ سخت جملن جي ڏي وٺ ٿي، ميچ ۾ اڳوڻي ڪرڪيٽر گوتم گمڀير جي ٽيم کي معمولي حدف باوجود شڪست جو منھن ڏسڻو پيو.
حدف پورو ڪرڻ جي ڪوشش ۾ لکنئو جي بيٽنگ دوران بيٽر نوين الحق ۽ بينگلور جي فيلڊر ويرات ڪوھلي وچ ۾ لفظي جنگ شروع ٿي تھ امپائر وچ ۾ پيو، جڏھن تھ ميچ جي پڄاڻي بعد رانديگرن ھٿ ملايو، نوين الحق ويرات ڪوھلي جو ھٿ پري ڪري ڇڏيو جنھن تي ويرات ڪاوڙجي پيو جنھن بعد لکنئو جائنٽس جي مينٽور گوتم گمڀير بھ جھيڙي ۾ شامل ٿي ويو.
ڀارتي ميڊيا گوتم گمڀير ۽ ويرات ڪوھلي ۾ جھيڙي جو ذميوار نوين الحق کي قرار ڏنو.
ويرات ڪوھلي ۽ گوتم گمڀير وچ ۾ آءِ پي ايل 2013ع ۾ بھ منھن ماري ٿي ھئي جنھن بعد ٻنھي رانديگرن ۾ لاڳاپا بھتر نھ ھئا.
ڀارتي ڪرڪيٽ بورڊ معاملي جو نوٽيس وٺندي ويرات ڪوھلي، گوتم گمڀير تي ميچ فيس جو ھڪ سئو سيڪڙو ڏنڊ لاڳو ڪري ڇڏيو، جڏھن تھ افغان ڪرڪيٽر نوين الحق تي بھ ميچ جو 50سيڪڙو ڏنڊ لاڳو ڪيو ويو، ٽنھي ڪرڪيٽرز کي وارننگ پڻ ڏني وئي.
ويرات ڪوھلي ۽ گوتم گمڀير وچ ۾ ٿيل منھن ماري واري وڊيو سوشل ميڊيا تي وائرل آھي.
