آمريڪا جي شهر نيويارڪ جي پهرين مسلمان ميئر ظهران ممداني پنهنجي عهدي جو قسم کڻي ورتو

آمريڪا جي شهر نيويارڪ جي پهرين مسلمان ميئر ظهران ممداني پنهنجي عهدي جو قسم کڻي ورتو . ظهران ممداني نيويارڪ جو پهريون مسلمان، پهريون ڏکڻ ايشيائي ۽ پهرين آفريڪي نسل جو ميئر بڻجي ويو آهي. قسم کڻڻ کانپوءِ ظهران ممداني چيو ته نيويارڪ جي عوام کي نئين سال جي مبارڪ هجي، ميئر طور قسم کڻڻ هن لاءِ اعزاز جي ڳالهه آهي. نيويارڪ جي نئين چونڊيل ميئر ظهران ممداني اڌ رات جو سٽي هال هيٺان هڪ ڊگهي عرصي کان بند سب وي اسٽيشن ۾ پنهنجي عهدي جو قسم کنيو. ظهران ممداني قرآن پاڪ تي هٿ کڻي پنهنجي عهدي جو قسم کنيو. تاريخ ۾ پهريون ڀيرو نيويارڪ سٽي جي ڪنهن ميئر قرآن پاڪ تي هٿ رکي پنهنجو عهدي جو قسم کنيو آهي. ماضي ۾ گهڻي قدر ميئر بائبل تي هٿ رکي قسم کڻندا رهيا آهن، آئيني طور ڪنهن مذهبي ڪتاب جو استعمال لازمي ناهي. ظهران ممداني قرآن پاڪ جا ٻه نسخا استعمال ڪيا جنهن ۾ هڪ سندس ڏاڏي طرفان ڏنل قرآن ۽ ٻيو صديون پراڻو مختصر قرآني نسخو شامل آهي. صديون پراڻو تاريخي قرآني نسخو نيويارڪ پبلڪ لائبريري جي شومبرگ سينٽر ۾ محفوظ آهي ۽ ارڙهين يا اڻويهين صدي سان تعلق رکي ٿو. ماهرن جو چوڻ آهي ته قرآن پاڪ عام ماڻهن جي استعمال لاءِ تيار ڪيو ويو هو جيڪو سندس سادگي ۽ عوامي پهچ جي علامت آهي. ظهران ممداني يوگنڊا ۾ جنم ورتو ۽ نيويارڪ ۾ وڏو ٿيو، جڏهن ته سندس گهر واري آمريڪي ڄائي شامي آهي. چونڊ مهم دوران ظهران ممداني مهانگائي ۽ شهري مسئلن تي ڌيان ڏنو پر هن پنهنجي مسلم سڃاڻپ کي به کليل نموني پيش ڪيو. ظهران ممداني جي اڀرتي سياسي ڪاميابيءَ سان اسلامو فوبيا ۽ تنقيد به سامهون آئي آهي، ڪجهه قدامت پسند حلقن سندس قرآن پاڪ تي قسم کڻڻ تي اعتراض ڪيو. ظهران ممداني واضح ڪيو ته هو پنهنجي سڃاڻپ يا عقيدي تي ڪنهن به قسم جي سوديبازي نه ڪندو ۽ پنهنجي زندگي ۽ ايمان کي فخر سان سڀني سامهون رکندو. قسم کڻڻ کانپوءِ استعمال ٿيل تاريخي قرآن نيويارڪ پبلڪ لائبريري ۾ عوامي نمائش لاءِ رکيو ويندو،