افغانستان مان ٿيندڙ دهشتگردي کي ترجيحي مسئلو قرار ڏنو وڃي : منير اڪرم

پاڪستان مطالبو ڪيو آهي ته افغانستان مان ٿيندڙ دهشتگردي کي ترجيحي مسئلو قرار ڏنو وڃي. مستقل سفير منير اڪرم نيويارڪ ۾ سلامتي ڪائونسل جي اجلاس کي خطاب ڪندي چيو ته جعفر ايڪسپريس حملي دوران دهشتگردن جو پنهنجي هينڊلرز سان افغانستان ۾ لاڳيتو رابطو هو، دهشتگردن کي افغانستان مان حملي جي منصوبابندي ۽ هدايتون ڏنيون ويون. منير اڪرم چيو ته طالبان حڪومت داعش جي خاتمي جي لاءِ موثر ڪردار ادا ناهي ڪيو، پابندي مڙهيل ٽي ٽي پي، بي ايل اي، مجيد بريگيڊ سرحد پار حملن ۾ ملوث آهن، پاڪستان وٽ ثبوت آهن، حملو دشمن افغان پراڪسيز ذريعي ڪرايو. مستقل سفير جو وڌيڪ چوڻ هو ته دهشتگردي ۾ ملوث، مالي معاونن، سرپرستن ۽ سهولتڪارن کي ڪٽهڙي ۾ آندو وڃي، سلامتي ڪائونسل دهشتگردي خلاف پاڪستان سان فعال سهڪار ڪري.