قومي عوامي تحريڪ جي سربراهه اياز لطيف پليجيَ تڪراري آدمشماري جي نتيجن کي رد ڪندي چيو آهي ته سي سي آءِ مان سنڌ جي عوام جي خدشن باوجود تڪراري آدمشماري جا نتيجا قبول ڪرڻ جي ذميوار پ پ حڪومت آهي، تڪراري آدمشماري سنڌ جي ڊيموگرافي مٿان خطرناڪ وار آهي.
سنڌ ٽي وي نيوز جي پروگرام “بهائنڊ دي نيوز” ۾ ڳالهائيندي اياز لطيف پليجي چيو ته سنڌ جو عوام تڪراري آدمشماري کي رد ڪري ٿو، هن پهرين ڏينهن کان ئي موقف اختيار ڪيو هو ته آدمشماري غيرآئيني ۽ غيرقانوني آهي.
هن چيو ته آدمشماري جا نتيجا رد ڪرڻ لاءِ سنڌ جي سمورين سياسي پارٽين، قومپرستن، مذهبي جماعتن ۽ سڄاڻ ڌرين کي تڪڙو اجلاس گهرائي آئينده جو لائحه عمل جو اعلان ڪرڻ گهرجي.
سندس چوڻ هو ته هو تجويز ڏئي ٿو ته تڪراري آدمشماري خلاف ڪنڌڪوٽ کان ڪراچي تائين لانگ مارچ شروع ڪيو وڃي، سڄي سنڌ ۾ بيداري مارچ شروع ڪري سنڌ جي واهڻ وستين ۾ پهچي عوام کي خطرن کان آگاهي ڏني وڃي.
هن وڌيڪ چيو ته آدمشماري رد ڪرائڻ لاءِ سنڌ اسيمبلي آڏو ڌرڻو هنيو وڃي ۽ اهو ڌرڻو آدمشماري جا نتيجا رد ڪرائڻ تائين جاري رهڻ گهرجي.
پروگرام ۾ ڳالهائيندي ناليواري ليکڪ ۽ تجزينگار نصير ميمڻ چيو ته تڪراري آدمشماري جا نتيجا ڪنهن به صورت ۾ قبول نه ڪيا ويندا، سنڌ جو وڏو وزير پاڻ چئي چڪو آهي ته ڄاڻايل تڪراري آدمشماري جا نتيجا قبول نه ڪيا ويندا، پوءِ اهڙي ڪهڙي مجبوري هئي جو سنڌ جو وڏو وزير سي سي آءِ اجلاس ۾ تڪراري آدمشماري جا نتيجا قبول ڪيا. هن چيو ته هو تڪراري آدمشماري جو ذميوار پ پ ۽ سنڌ حڪومت کي سمجهن ٿا.
