جمهوريت هميشه ڳالهين سان اڳتي وڌندي آهي، ڊيڊلاڪ ان کي ڪمزور ڪندو آهي : راڻا ثناءُ الله

وزيراعظم جي سياسي معاملن جي خاص مددگار ۽ سينيٽر راڻا ثناءُ الله چيو آهي ته جمهوريت هميشه ڳالهين سان اڳتي وڌندي آهي، ڊيڊلاڪ ان کي ڪمزور ڪندو آهي. سينيٽ اجلاس کي خطاب ڪندي راڻا ثناءُ الله چيو ته وزيراعظم ٻه ڀيرا مخالف ڌر کي ايوان جي فلور تي ڳالهين جي آڇ ڪري چڪو آهي، هن اها به آڇ ڪئي آهي ته جيڪڏهن مخالف ڌر اسپيڪر جي چيمبر ۾ ڳالهائي ته هو پاڻ اتي ايندو. سندس چوڻ هو ته وزيراعظم مخالف ڌر کي ميثاق استحڪام جمهوريت لاءِ ڳالهين جي دعوت ڏئي چڪو آهي. راڻا ثناءُ الله جيل جي ملاقاتن جي حوالي سان چيو ته اهي مڪمل طور تي قانون ۽ انصاف جي مطابق ٿينديون آهن ۽ قانون ڪنهن به قيدي کي جيل ۾ ويٺي امن امان جي صورتحال کي خراب ڪرڻ جي ڪوشش ڪرڻ جي اجازت نٿو ڏئي. سندس چوڻ هو ته پي ٽي آءِ باني جيل ۾ ملاقات دوران پنهنجي ڀيڻ کي امن امان خراب ڪرڻ ۽ پارٽي معاملن ۾ مداخلت ڪرڻ جون هدايتون ڏنيون. سينيٽر راڻا ثناءُ جو چوڻ هو ته اها ڳالهه رڪارڊ تي آهي ته پي ٽي آءِ باني چيو آهي ته اهو حڪومت سان ڳالهائڻ لاءِ تيار ناهي، جڏهن ته جن سان هو ڳالهائڻ چاهي ٿو اهي هن سان ڳالهائڻ لاءِ تيار نه آهن. راڻا ثناءُ الله جو چوڻ هو ته پي ٽي آءِ باني پنهنجي ڀيڻ سان ملاقات دوران خانداني معاملن تي نه ڳالهايو پر مالي معاملن ۽ پارٽي ۾ شامل ٿيڻ يا خارج ڪرڻ بابت هدايتون ڏنيون. سندس چوڻ هو ته هنن جو اصولي موقف آهي ته سڀئي ملاقاتون قانون جي مطابق ٿيڻ گهرجن ۽ رياست جو امن امان متاثر ڪندڙ ملاقاتن جي اجازت نه ٿي ڏئي سگهجي. هن چيو ته ڳالهين جو رستو اڄ به کليل آهي، جيڪڏهن ان معاملي تي ڪميٽي ٺاهڻي آهي ته لاڳاپيل ڌر کي پهريان پنهنجي قيادت سان ڳالهائڻ گهرجي.