غزه ۾ يهودي فوج جي بربريت جاري آهي، قابض فوج طرفان رفح ۾ رهائشي هنڌن تي بمباري ڪئي پئي وڃي

غزه ۾ يهودي فوج جي بربريت جاري آهي، قابض فوج طرفان رفح ۾ رهائشي هنڌن تي بمباري ڪئي پئي وڃي. عرب ميڊيا جو چوڻ آهي ته اسرائيلي فوج البريج پناهگير ڪيمپ ۽ نصيرات ڪيمپ تي حملن ۾ ڪيترن ئي ماڻهن جي شهيد ٿيڻ جا اطلاع آهن جڏهن ته خان يونس ۾ گھرن تي بمباري جي نتيجي ۾ 6 فلسطيني شهيد ٿي ويا آهن جڏهن ته النصر ميڊيڪل ڪمپليڪس تي بمباري سبب اسپتال ۾ باهه لڳي وئي. عرب ميڊيا موجب اسرائيي فوج جي دهشتگردي سبب ريڊ ڪريسينٽ 48 ڪلاڪن لاءِ ڪم روڪي ڇڏيو آهي. عرب ميڊيا جو چوڻ آهي ته7 آڪٽوبر کان هن وقت تائين اسرائيلي حملن ۾ شهيد فلسطينين جو انگ 30 هزار تائين پهچي ويو آهي جڏهن ته 70 هزار    325 ماڻهو زخمي ٿي چڪا آهن. ٻئي پاسي حماس اڳواڻ اسماعيل هانيه چيو آهي ته اسرائيل جي هر جارحيت جو منهن ٽوڙ جواب ڏيندا، هو ڳالهين ۾ نرمي سان گڏ جنگ لاءِ به تيار آهن. هن وڌيڪ چيو ته مسلم دنيا توڙي ۽ پاڙيسري ملڪ اتر غزه ۾ ڏڪار جي اسرائيلي سازش روڪن، مسجد اقصى جو محاصرو غزه جي محاصري وانگر قبول نه ڪندا. ٻئي پاسي امريڪا غزه جي لاءِ 5 ڪروڙ 30 لک ڊالر جي امداد ڏيڻ جو اعلان ڪيو آهي……