ميرپور بٺوري ۾ بدامني، سنڌ هائوس تي فائرنگ ۽ زئور برادري جي ماڻهن تي قاتلاڻي حملي جا جوابدار گرفتار نه ٿيڻ خلاف مختلف ڌرين پاران احتجاج

ميرپور بٺوري ۾ بدامني، سنڌ هائوس تي فائرنگ ۽ زئور برادري جي ماڻهن تي قاتلاڻي حملي جا جوابدار گرفتار نه ٿيڻ خلاف مختلف ڌرين پاران احتجاجي ريلي ڪڍي ڌرڻو هنيو ويو. نواز خان زئور، يوسف ڪنڀار، شيراز زئور ۽ ٻين جي اڳواڻيءَ ۾ کورواهه چوڪ کان مين بس اسٽاپ تائين احتجاجي ريلي ڪڍي ڌرڻو هڻي نعريبازي ڪئي وئي. احتجاج ڪندڙن ميڊيا سان ڳالهائيندي چيو ته ميرپور بٺوري ۾ بدامني وڌي وئي آهي،  شهري پاڻ کي غير محفوظ سمجهي رهيا آهن. هنن چيو ته رات دير سان ڦورن سنڌ هائوس تي فائرنگ ڪندي سرتاج زئور کان موٽرسائيڪل ڦر ڪئي. سندن چوڻ هو ته ڪجهه ڏينهن اڳ هٿياربندن موٽرسائيڪل ڦر دوران اسماعيل زنئور سميت ٻن ڄڻن کي زخمي ڪيو هو. احتجاج ڪندڙن اعليٰ اختيارين کان مطالبو ڪيو ته بدامني تي ضابطو آڻي امن امان بحال ڪرائي ڦر ٿيل موٽرسائيڪلون واپس ڪرائي جوابدارن کي گرفتار ڪيو وڃي.