وفاقي گهرو وزير محسن نقوي جي صدارت هيٺ ملڪ ۾ محرم الحرام دوران امن امان قائم ڪرڻ بابت اهم اجلاس

وفاقي سرڪار پهرين کان ڏهه محرم تائين جلوسن ۽ مجلسن جي سڪيورٽي لاءِ ڊرون جي استعمال تي پابندي مڙهي ڇڏي آهي، انٽرنيٽ يا موبائل فون جي بندش جو فيصلو سڪيورٽي خدشن کي نظر ۾ رکندي صوبن جي صلاح مشوري سان ڪيو ويندو. وفاقي گهرو وزير محسن نقوي جي صدارت هيٺ ملڪ ۾ محرم الحرام دوران امن امان قائم ڪرڻ بابت اهم اجلاس ٿيو، جنهن ۾سمورن صوبن، آزاد ڪشمير، گلگت بلتستان ۽ اسلام آباد ۾ محرم الحرام جي سڪيورٽي پلان جو  تفصيلي جائز ورتو ويو. اجلاس دوران پهرين کان ڏهه محرم تائين جلوسن ۽ مجلسن جي سڪيورٽيءَ لاءِ  ڊرون جي استعمال تي پابندي جو فيصلو ڪيو ويو. انٽرنيٽ يا موبائل فون جي بندش جو فيصلو سڪيورٽي خدشن کي نظر ۾ رکندي صوبن جي صلاح مشوري سان ڪيو ويندو. گهرو وزير محسن نقوي جو چوڻ هو ته انٽرنيٽ يا موبائل فون بند ٿيڻ سان شهرين کي ڏکيائي ٿئي ٿي، ان لاءِ زميني حقيقتن ۽ سڪيورٽي صورتحال موجب فيصلو ڪرڻ جي ضرورت آهي. هن چيو ته وفاق، صوبن، آزاد ڪشمير، گلگت بلتستان ۽ اسلام آباد ۾ امن لاءِ هر ممڪن سهڪار فراهم ڪندو. محسن نقوي چيو ته امن بابت صوبن، آزاد ڪشمير ۽ گلگت بلتستان جون ضرورتون پوريون ڪيون ويندو، برساتن کي نظر ۾ رکندي جلوسن ۽ مجلسن لاءِ اڳواٽ پلان تيار ڪيو ويندو، اچ وڃ جي رستن تي سخت چيڪنگ ڪئي وڃي، جلوسن ۽ مجلسن جي ڪئمرائن ذريعي نگراني ڪئي وڃي. اجلاس ۾ وفاقي گهرو سيڪريٽري، مذهبي معاملن بابت وفاقي سيڪريٽري ۽ ٻين شرڪت ڪئي.