پاڪستان هڪ آزاد ملڪ آهي، ڪنهن ملڪ جي قرضن جي ڄار ۾ نه ڦاسڻ گهرجي : نيٽلي بيڪر

پاڪستان ۾ آمريڪي سفارتخاني جي انچارج نيٽلي بيڪر چيو آهي ته پاڪستان هڪ آزاد ملڪ آهي، ڪنهن ملڪ جي قرضن جي ڄار ۾ نه ڦاسڻ گهرجي، پاڪستان کي پنهنجي خانگائڻ جي پروگرام تي عمل ڪرڻ گهرجي. ايوان صدر ۾ صحافين سان غير رسمي ڳالهيون ڪندي نيٽلي بيڪر چيو ته آءِ ايم ايف جي سڌارن جي پروگرام تي عمل سان ئي پاڪستان جي اقتصادي حڪمت عملي ڪامياب ٿيندي. سندس چوڻ هو ته آءِ ايم ايف پاڪستان ۾ اهڙا معاشي سڌارا چاهي ٿي جيڪي بهتر ۽ جٽادار معيشيت جو سبب بڻجڻ، ورلڊ بينڪ به پاڪستان سان هاڪاري انداز ۾ سهڪار ڪري رهي آهي. پاڪستان ۾ آمريڪي سفارتخاني جي انچارج چيو ته پاڪستان سان آمريڪا جو اڳ اقتصادي ميدان ۾ سهڪار تمام سٺو هلي رهيو آهي، پاڪستا جي خودمختاري آمريڪا لاءِ اهم آهي ۽ آمريڪا وڏي دل سان پاڪستان جي مدد ڪري رهيو آهي. پاڪستان جي چيف سان ويجهن لاڳاپن بابت سوال جي جواب ۾ نيٽلي بيڪر چيو ته پاڪستان هڪ آزاد ۽ خودمختار ملڪ آهي، جيڪو دنيا جي ڪنهن به ملڪ سان لاڳاپا رکي سگهي ٿو پر کيس پنهنجي معاشي خودمختاري ۽ مفادن جو محتاط انداز ۾ تحفظ ڪرڻو پوندو. هن چيو ته ڪوبه اهڙو منصوبو جيڪو ڪنهن به ملڪ لاءِ قرض جي ڄار جو سبب بڻجي سڄي دنيا لاءِ ڳڻتي جو سبب آهي. پاڪستان ۾ آمريڪي سفارتخاني جي انچارج چيو ته واشنگٽن کي پاڪستان ۽ چين جي لاڳاپن جي حساس نوعيت بابت مڪمل ڄاڻ آهي. نيٽلي بيڪر چيو ته صدر ٽرمپ کي جيئن کي پنهنجي مصروف عالمي ذميوارين مان واندڪائي ملندي هو پاڪستان جو دورو ڪندو، اهو دور جلد ٿيڻ جو امڪان آهي. سندس چوڻ هو آمريڪي صدر ڊونلڊ ٽرمپ امن جو داعي آهي ۽ پاڪستان سندس نالي کي نوبل انعام لاءَ درست تجويز ڪيو.