پي ٽي آءِ باني ملڪ جي ائٽمي طاقت خلاف استعمال ٿي رهيو آهي: شرجيل انعام ميمڻ

سينيئر صوبائي وزير شرجيل انعام ميمڻ چيو آهي ته پي ٽي آءِ باني ملڪ جي ائٽمي طاقت خلاف استعمال ٿي رهيو آهي،  پاڪستان کي ڪمزور ڪرڻ لاءِ هر قسم جون ڪوششون ٿي رهيون آهن. ڪراچي ۾ پريس ڪانفرنس ڪندي شرجيل انعام ميمڻ چيو ته پي ٽي آءِ ملڪ تي دٻاءُ وجهڻ لاءِ  پرڏيهي لابيز کي ٽاسڪ ڏنو آهي، ريڊ لائن منصوبي جي دنيا جي ڪنهن به فرم کان آڊٽ ڪرائڻ لاءِ تيار آهن، سنڌ سرڪار طرفان ريڊ لائن بي آر ٽي منصوبي ۾ ڪنهن به قسم جي دير نه ڪئي پئي وڃي. هن چيو ته مخالفن کي سياسي پوائنٽ اسڪورنگ کان روڪي نه ٿو سگهجي،  ٽرانسپورٽ سميت ٻيون سهولتون سنڌ سرڪار جي پهرين ترجيح آهي،  عوام کي صحت، پاڻي سميت ٻيون سهولتون ڏنيون وينديون. شرجيل انعام ميمڻ نئين سال جي مبارڪباد پيش ڪندي چيو ته نئون سال ضرور ملهايو پر اهڙو ڪم نه ڪيو جنهن سان ڪنهن کي تڪليف ٿئي. سندس چوڻ هو ته نئين سال جي موقعي تي هوائي فائرنگ کان پاسو ڪيو وڃي ته جاني نقصان کان بچي سگهجي. شرجيل ميمڻ چيو ته ريڊ لائين بي آر ٽي تي مختلف بيان اچي رهيا آهن، حڪومت ان تي ڏينهن رات ڪم ڪري رهي آهي، اسان جي طرف کان ڪا به رڪاوٽ يا دير ناهي، پر ڪجهه مسئلن کي منهن ڏئي رهيا آهيون، جن کي حل ڪيو پيو وڃي. سينيئر صوبائي وزير چيو ته هو اهو به نٿا چاهين ته سياسي قيدي جو ڪيس فوجي عدالت ۾ هلي، پي ٽي آءِ باني فوجي عدالتن جي حق ۾ بيان ڏئي چڪو آهي. هن چيو ته اڄ به پارا چنار صورتحال جي ذميوار پي ٽي آءِ جي نااهل حڪومت آهي، پي ٽي آءِ حڪومت دوران بنون جيل مان دهشتگردن کي آزاد ڪيو ويو. سينيئر صوبائي وزير چيو ته پي ٽي آءِ باني پاڪستان جو ورهاڱو چاهي ٿو، هنن پاڪستان تي دٻاءُ وجهڻ لاءِ عالمي لابيز کي هائر ڪيو آهي. هن چيو ته پي ٽي آءِ جي هڪ ٽيم ڳالهين ۽ ٻي ٽيم پاڪستان کي بدنام ڪري رهي آهي، جيڪڏهن ڪنهن فوجي تنصيبات تي حملو ٿيو ته ڪيس به فوجي عدالت ۾ ٻڌو ويندو. سندس چوڻ هو ته پارا چنار واقعي جي ذميوار پي ٽي آءِ حڪومت آهي، باني پي ٽي آءِ پاراچنار واقعي بابت ڪو به بيان ناهي ڏنو. شرجيل انعام ميمڻ چيو ته نگران حڪومت جي 9 مهينن ۾ هڪ به ترقياتي ڪم نه ٿيو، پ پ حڪومت ايندي ئي ڪم شروع ڪيا آهن…………..