ڪراچي جي علائقي ايم اي جناح روڊ تي قائم گل پلازه کي لڳل باهه تي ضابطو آندو ويو، فوتين جو انگ وڌي 10 ٿي ويو، 22 ماڻهو زخمي، 58 گم

ڪراچي جي گل پلازا ۾ لڳل باهه 33 ڪلاڪن کانپوءِ مڪمل طور تي وسائي وئي، سرچ آپريشن دوران وڌيڪ چئن ماڻهن جا لاش ڪڍيا ويا جنهن کانپوءِ فوتين جو انگ 10 ٿي ويو. ايم اي جناح روڊ تي گل پلازا ۾ ڇنڇر جي رات تقرين سوا ڏهين وڳي باهه لڳي، گرائونڊ فلور تي لڳندڙ باهه ڏسندي ئي ڏسندي ٽئين منزل تائين پهچي وئي. خوفناڪ باهه سبب عمارت جا ڪيترائي حصا ڪري پيا. فائر فائٽرز 33 ڪلاڪن کان پوءِ باهه تي ضابطو آندو، جنهن کان پوءِ ڪولنگ جو عمل جاري آهي. اختيارين موجب، باهه تي ضابطو آڻڻ کان پوءِ، فائر فائٽر پلازا ۾ داخل ٿيا، سڙيل دڪانن ۾ محدود سرچ آپريشن ڪيو ويو، جنهن دوران هڪ ٻار سميت 3 ماڻهن جا لاش مليا ۽ انهن کي سول اسپتال ٽراما سينٽر منتقل ڪيو ويو. پلازا جي ٽئين ماڙ تي ڪنهن شخص جي ڦاٿل هجڻ جي امڪان تي ريسڪيو آپريشن ڪيو ويو، پر ڪو به ماڻهو نه ملي سگهيو. ريسڪيو ترجمان موجب، ڪٽرن جي مدد سان دريون ڪٽيون پيون وڃن، ۽ ڀت کي به هٿوڙن جي مدد سان ڪيرايو پيو وڃي. ريسڪيو عملدارن موجب، باهه عمارت جي پلرن کي ڪمزور ڪري ڇڏيو آهي، جنهن جي ڪري ڏار پئجي ويا آهن، عمارت تمام پراڻي هجڻ ڪري، ان جي ڪري تباهه ٿيڻ جو خدشو آهي.