ڪيٽي بندر: انڊس ڊيلٽا ۾ مٺو پاڻي ڇوڙ نه ٿيڻ سبب سمنڊ لکين ايڪڙ زمين ڳڙڪائي ويو

ڪيٽي بندر ۾ انڊس ڊيلٽا وارن علائقن ۾ پاڻي ڇوڙ نه ٿيڻ سبب سمنڊ روزاني سوين ايڪڙ زمينون ڳڙڪائي رهيو آهي، جڏهن ته جر جو 90 سيڪڙو پاڻي به کارو ٿي چڪو آهي. ڪوٽڙي ڊائون اسٽريم کان هيٺ دنيا جي 6 نمبر انڊس ڊيلٽا ۾مٺو پاڻي نه ڇڏڻ سبب سمنڊ تيزي سان روزاني سوين ايڪڙ زمينون ڳڙڪائي رهيو آهي، جر کارو ٿيڻ سبب علائقي ۾ ڏوڪار واري صورتحال آهي. ڪيٽي بندر جي 43 ديهن جي ڪيترن ئي علائقن مان پاڻي جي کوٽ سبب رهواسي لڏپلاڻ تي مجبور آهن. تعلقي ڪيٽي بندر جي پڇڙي وارين شاخن دارسي، انڊو خاناڻي، مليرڙي، جھالو ۽ ٻين ۾ پاڻي نه هجڻ سبب واري اڏامي رهي آهي.