اسلام آباد جي احتساب عدالت جي جج محمد اعظم خان پارڪ لين ريفرنس تي ٻڌڻي ڪئي.
آصف علي زرداري وڊيو لنڪ ذريعي بلاول هائوس ڪراچي مان عدالت ۾ پيش ٿيو.
ٻڌڻي دوران آصف علي زرداري موقف اختيار ڪيو ته سندس وڪيل سپريم ڪورٽ ۾ آهي سندس غير موجودگي ۾ فرد جرم لاڳو نه ٿو ڪري سگهجي.
جج اعظم خان رمارڪس ڏيندي چيو ته فرد جرم توهان تي لاڳو ڪيو ويندو، جيڪڏهن توهان جو وڪيل نه ٿو اچي ته سندس غير حاضري لڳائي ويندي.
عدالت آصف علي زرداري، انور مجيد، فاروق عبدالله، سليم فيصل ۽ محمد حنيف تي به فرد جرم لاڳو ڪيو.
اڳوڻي صدر آصف علي زرداري ۽ انور مجيد سميت ٻين جوابدارن ڏوهه قبول ڪرڻ کان انڪار ڪري ڇڏيو.
آصف علي زرداري چيو ته ارڙهين ترميم سبب مٿس ڪيس داخل ڪيا پيا وڃن، مٿس دٻاءُ وجهڻ لاءِ ڪيس ٺاهيا ويا آهن، سياسي بدنامي جو ڊرامو ڪيو ويو آهي.
هن چيو ته عدالتن کي اڻ ڌريون رهي فيصلا ڪرڻ گهرجن.
سندس چوڻ هو ته مٿس ڪيترو به دٻاءَ وڌو وڃي پر هو پنهنجي پوزيشن تان پوئتي نه هٽندو پنهنجي موقف تي قائم رهندو.
آصف علي زرداري چيو ته هو سنڌي آهي ۽ سنڌ جي نمائندگي ڪري ٿو.
جج رمارڪس ڏيندي چيو ته هنن پهرين سيپٽمبر تي شاهدن کي طلب ڪيو آهي، جنهن کانپوءِ سڀ ڪجهه واضح ٿي ويندو.
عدالت طرفان اڳوڻي صدر آصف علي زرداري تي فرد جرم ۾ چيو ويو آهي ته هن صدر طور لاڳاپيل اختيارين تي اثرانداز ٿي قرض جي رقم فرنٽ مين ڪمپنين کي جاري ڪرائي.
فرد جرم ۾ چيو ويو آهي ته آصف علي زرداري بد نيتي سان پنهنجي فرنٽ ڪمپني پارٿينون کي ڏيڍ ارب رپين جو قرض ڏياريو، هو پارڪ لين ڪمپني جو ڊائريڪٽر هو ۽ جعلي سازي جي رٿا بندي ڪئي.
فرد جرم ۾ چيو ويو ته فراڊ ذريعي حاصل ڪيل رقم آصف علي زرداري پنهنجي ذاتي مقصدن لاءِ استعمال ڪئي، اها رقم جعلي بئنڪ اڪائونٽس ۾ منتقل ڪئي وئي.
پارڪ لين رفرنس ۾ آصف علي زرداري تي جعلي بئنڪ اڪائونٽس ذريعي قومي ناڻي کي 3 ارب 77 ڪروڙ رپين جو نقصان پهچائڻ جو الزام آهي.
اڳوڻي صدر آصف علي زرداري ۽ شريڪ جوابدارن خلاف داخل نيب ريفرنس 13 صفحن تي ٻڌل آهي.
