پنجاب جي وڏي وزير عثمان بوزدار، نيب آڏو پيش ٿي شراب جا لائسنس جاري ڪرڻ بابت پوڻا ٻه ڪلاڪ سوالن جا جواب ڏنا، جنهن بعد کانئس اثاثن جا تفصيل طلب ڪيا ويا.
پنجاب جو وڏو وزير عثمان بوزدار بنا پروٽوڪول نيب آفيس پهتو، جتي نيب طرفان شراب جا لائسنس جاري ڪرڻ بابت عثمان بوزدار کان سوال پڇيا ويا.
نيب عملدارن ٻارهن صفحن تي ٻڌل نئون سوالنامو به عثمان بوزدار کي ڏئي ڇڏيو، جڏهن ته کانئس خاندان جا اثاثن جا تفصيل به طلب ڪيا ويا.
نيب پيشي بعد پنجاب جي وڏي وزير عثمان بوزدار ترت صلاح مشوري وارو اجلاس طلب ڪري ورتو.
نيب ۾ پيشي بعد جاري ڪيل بيان ۾ عثمان بوزدار چيو ته شراب لائسنس جي معاملي تي مونجهارا ختم ڪرڻ لاءِ حقيقتون نيب آڏو رکيون، سندس دامن صاف آهي، جڏهن به کيس گهرايو ويو هو پيش ٿيندو، قوم ڪالهه قانون ٽوڙڻ ۽ اچ قانون پسنديءَ جو مظاهرو ڏٺو.
هن چيو ته قانوني گهرجون پوريون ڪندي هو ذاتي حيثيت ۾ نيب آڏو پيش ٿيو ۽ پنهنجو موقف پيش ڪيو، نئين پاڪستان ۾ ڪو به قانون کان مٿانهون ناهي.
پنجاب جي وڏي وزير چيو ته نيب ۾ پيش ٿي هن قانون جي بالادستي تسليم ڪرڻ واري روايت قائم ڪئي،
هوڏانهن شراب جو لائسنس جاري ڪرڻ واري ڪيس ۾ وڏي اڳڀرائي ٿي آهي، اڳوڻي ڊي جي ايڪسائيز اڪرم اشرف گوندل نيب آڏو پيش ٿي بيان رڪارڊ ڪرائي ڇڏيو ۽ هن نيب چيئرمين کي معافي جي درخواست به ڪري ڇڏي.
