تعليم واري صوبائي وزير سعيد غني خانگي اسڪول مالڪن کي 15 آگسٽ کان تعليمي ادارا کولڻ وارو فيصلو واپس وٺڻ جي اپيل ڪندي چيو آهي ته وفاقي ۽ صوبائي حڪومت طرفان 15 سيپٽمبر تي تعليمي ادارا کولڻ واري فيصلي تي عمل ڪيو وڃي.
جاري ڪيل بيان ۾ سعيد غني چيو ته 15 آگسٽ کان اسڪول کولڻ بابت خانگي اسڪولز ايسو سي ايشن جي اعلان کانپوءِ ٻارن ۽ سندن والدين ۾ بي چيني آهي.
سندس چوڻ هو ته هو خانگي اسڪولن جي مسئلن تي پهريان به انهن جو آواز وفاق تائين پهچايو چڪا آهن ۽ اڳتي به سندن ساٿ ڏنو ويندو.
سعيد غني چيو ته 15 آگسٽ کان تعليمي ادارا کولڻ بابت خانگي اسڪولز ايسوسي ايشن جو اعلان حڪومتي رٽ کي چئلينج ڪرڻ برابر آهي، نٿا چاهين ته اهڙي ڪارروائي ڪئي وڃي جنهن سان اسڪول مالڪن ۽ اتي تعليم حاصل ڪندڙ شاگردن کي نقصان پهچي.
هن چيو ته وفاقي حڪومت جي ٺاهيل نيشنل ڪو آرڊينيشن ڪميٽي ۾ سمورن صوبن جا وزير ۽ وفاقي تعليم وارو وزير به شامل آهي، سڀني جي راءِ سان تعليمي ادارا 15 سيپٽمبر کان کولڻ تي اتفاق ڪيو ويو آهي.
صوبائي وزير سعيد غني چيو ته اميد آهي ته خانگي اسڪولن جون سموريون تنظيمون حڪومت سان گڏ سهڪار ڪندي تعليمي ادارا 15 سيپٽمبر کان کولڻ جو اعلان ڪنديون……….
